বিশেষভাৱে সক্ষম চাইকেল আৰোহী ৰাকেশ বণিক এপ্ৰিল মাহত ৰাছিয়াৰ মস্কোৰ পৰা গুৱাহাটীলৈ ৯০০০ কিলোমিটাৰ একক যাত্ৰাৰ পৰিকল্পনা কৰিছে। ভাৰতীয় পেৰা চাইকেল আৰোহীৰ এইটোৱেই হ’ব প্ৰথম দীৰ্ঘ দূৰত্বৰ যাত্ৰা।
ৰাষ্ট্ৰীয় আৰু আন্তঃৰাষ্ট্ৰীয় চাইকেল ইভেণ্টত অংশগ্ৰহণ কৰা ৩৯ বছৰীয়া খেলুৱৈগৰাকীয়ে অসমৰ পৰ্যটন আৰু ফিট ইণ্ডিয়া আন্দোলনক প্ৰচাৰৰ বাবে ১২০ দিনীয়া এই যাত্ৰা সম্পূৰ্ণ কৰাৰ লক্ষ্য লৈছে।
বাণিকে আশা কৰিছে যে তেওঁৰ এই যাত্ৰাই মানুহক নিজৰ সীমা অতিক্ৰম কৰিবলৈ উৎসাহিত কৰিব আৰু প্ৰমান কৰিব যে কোনো প্ৰত্যাহ্বান অতিক্ৰম নকৰাকৈ সফলতা লাভ কৰিব নোৱাৰে। তেওঁ আনক দুঃসাহসিক কৰ্ম, ফিটনেছ, আৰু অধ্যৱসায়ক আকোৱালি ল’বলৈ অনুপ্ৰাণিত কৰিব বিচাৰে বুলি মত প্ৰকাশ কৰে।
“ভলগা ব্ৰহ্মপুত্ৰ” নামেৰে এপ্ৰিল মাহৰ প্ৰথম সপ্তাহত মস্কোত থকা ভাৰতীয় দূতাবাসৰ পৰা আৰম্ভ কৰিব এই যাত্ৰা। বণিকে কাজাখাস্তান, কিৰ্গিস্তান, চীন, নেপাল, ৰাছিয়া, ভাৰতৰ দৰে দেশৰ মাজেৰে চাইকেল চলাব আৰু ইয়াক সম্পূৰ্ণ হ’বলৈ প্ৰায় চাৰি মাহ সময় লাগিব বুলি সদৰী কৰে।
অসমৰ মুখ্যমন্ত্ৰী হিমন্ত বিশ্ব শৰ্মাই বাণিকৰ মনোভাৱক প্ৰশংসা কৰাৰ লগতে তেওঁৰ ভ্ৰমণৰ বাবে সমৰ্থন আগবঢ়ায়।
উল্লেখ্য যে ২০১২ চনত বাণিকে দুৰ্ঘটনাত সোঁ ভৰিখন হেৰুৱাইছিল যদিও ইয়াক বাধাৰ প্ৰাচীৰ হ’বলৈ নিদিলে। কৃত্ৰিম অংগ আৰু তীব্ৰ প্ৰশিক্ষণ তথা অধ্যৱসায়ৰ বলত কৰি এজন পেছাদাৰী চাইকেল আৰোহী হিচাপে প্ৰইগণিত হয়। ইয়াৰ পূৰ্বে বাণিকে ২০১৮ চনত বেংককৰ পৰা গুৱাহাটীলৈ ৪৫০০ কিলোমিটাৰ যাত্ৰাকে ধৰি আন আন দীঘলীয়া চাইকেল যাত্ৰাও সম্পূৰ্ণ কৰিছে।
