ৰাজ্যত ধাৰাবাহিক ভাৱে চলি আছে নাগৰিকত্ব সংশোধনী বিধেয়ক ২০১৬ বিৰুদ্ধে তীব্ৰ প্ৰতিবাদ। ৰাজ পথলৈ ওলাই আহিছে অসমৰ জনগণ। ইয়াৰ সমান্তৰালভাৱে আজি পুৱাই শিৱসাগৰৰ সমূহ ব্যৱসায়ী এই জাতি ধ্বংসী বিধেয়কখনৰ বিৰুদ্ধে ওলাই আহিল ৰাজপথলৈ।
কেন্দ্ৰীয় চৰকাৰে একপক্ষীয় ভাৱে জাপি দিব বিচৰা নাগৰিকত্ব সংশোধনী বিধেয়কৰ বিৰোধিতা কৰি আজি শিৱসাগৰৰ সন্মিলীত ব্যৱসায়ী সন্থাৰ উদ্যোগত আৰু সকলো ব্যৱসায়ী সন্থা তথা ৰাইজৰ সহযোগত পুৱা ১০ বজাৰ পৰা দুপৰীয়া ১২ বজালৈ সম্পূৰ্ণ বন্ধ ৰাখে নিজৰ নিজৰ ব্যৱসায়ী প্ৰতিষ্ঠান।
লগতে জিলাখনৰ সকলো ব্যৱসায়ীয়ে মুখত ক’লা কাপোৰ পৰিধান কৰি নগৰৰ দ’লমুখ চাৰিআলিত এক অৱস্থান ধৰ্মঘট কাৰ্যসূচী ৰূপায়ণ কৰে।
আনহাতে নাগৰিকত্ব সংশোধনী বিধেয়ক বাতিল কৰাৰ দাবীত একেদৰে অসম জাতীয়তাবাদী যুৱ পৰিষদ শিৱসাগৰ নগৰ সমিতিয়েও প্ৰতিবাদী কাৰ্যসূচী ৰূপায়ণ কৰে। নগৰৰ ষ্টেচন চাৰিআলিস্থিত ৰংপুৰ জ্যোতি ক্লাবত ক’লা পতাকা উত্তোলন কৰাৰ লগতে মুখ্য মন্ত্ৰী সৰ্বানন্দ সোণোৱাল আৰু প্ৰধান মন্ত্ৰী নৰেন্দ্ৰ মোদীৰ প্ৰতিকৃতি দাহ কৰে।
