মঙলবাৰে জম্মুত সংঘটিত হৈছে এক ভয়াবহ দুৰ্ঘটনা। অমৃতসৰৰ পৰা কাটৰালৈ যোৱা এখন বাছ ঝজ্জাৰ কোটলিৰ গভীৰ খাৱৈত বাগৰি পৰি ১০ জন লোকৰ মৃত্যু হোৱাৰ লগতে কেইবাজনো যাত্ৰী আহত হয়। আহতসকলক চিকিৎসালয়লৈ প্ৰেৰণ কৰা হৈছে। SDRF আৰু জম্মু-কাশ্মীৰ আৰক্ষীয়ে সেই স্থানত উপস্থিত হৈ উদ্ধাৰৰ কাম আৰম্ভ কৰিছে। মৃত লোকসকলৰ ভিতৰত বিহাৰৰ লখীচৰাই আৰু বেগুছৰাই জিলাৰ লোকো আছে।
উদ্ধাৰ অভিযানত নিয়োজিত চি আৰ পি এফ বিষয়া অশোক চৌধাৰীয়ে জনায় যে পুৱা দুৰ্ঘটনাটোৰ বিষয়ে তথ্য পোৱাৰ লগে লগে বাহিনীৰ এটা দল তাত উপস্থিত হৈ উদ্ধাৰ অভিযান আৰম্ভ কৰে। মৃতদেহবোৰ উলিয়াই অনা হয়। আহতসকলক চিকিৎসালয়লৈ লৈ যোৱা হৈছে।
চিআৰপিএফৰ সৈতে আৰক্ষীৰ দলো উদ্ধাৰ অভিযানত নিয়োজিত হৈ আছে। উদ্ধাৰ অভিযান চলি আছে। বাছখনত বিহাৰৰ পৰা কাটৰালৈ যোৱা লোক আছিল বুলি জানিব পৰা গৈছে।
লগতে পঢ়ক: IPL 2023 Final: বৰ্ষাস্নাত ফাইনেলত চেন্নাইৰ বিজয়গাথা! উজলিল ধোনিৰ মুখ, স্বপ্নভংগ হাৰ্দিকৰ
বিষয়াসকলে জনোৱা মতে, বাছখন কাটৰালৈ গৈ থকা অৱস্থাত ঝজ্জাৰ কোটলি অঞ্চলত সংঘটিত হয় এই দুৰ্ঘটনা। বাছখনত থকা তীৰ্থযাত্ৰীসকল গৈ আছিল মাতা বৈষ্ণো দেৱী মন্দিৰলৈ। ত্ৰিকুটা পাহাৰৰ ওপৰত অৱস্থিত বিখ্যাত তীৰ্থযাত্ৰাৰ ভিত্তি শিবিৰ হ’ল কাটৰা।
জম্মুৰ জ্যেষ্ঠ আৰক্ষী অধীক্ষক চন্দন কোহলীয়ে জনোৱা মতে, ১০ জন লোকৰ মৃত্যু হোৱাৰ লগতে ২০ জন আহত হৈছে। উদ্ধাৰ অভিযান চলি আছে। স্থানীয় বাসিন্দাসকলে উদ্ধাৰ অভিযানত আৰক্ষীক সহায় কৰিছে।
তেওঁ জনোৱা মতে, আহতসকলক জম্মুৰ চৰকাৰী চিকিৎসা মহাবিদ্যালয় হাস্পতালত ভৰ্তি কৰোৱা হৈছে।
লগতে পঢ়ক: মহিলাৰ সৈতে কেতিয়াও নকৰিব এনে কাম, নহলে হ’ব সর্বনাশ! কি কয় চাণক্য নীতিয়ে
উল্লেখ্য যে যোৱা ২১ মে’ত জম্মু-কাশ্মীৰৰ ৰিয়াছি জিলাত মাতা বৈষ্ণো দেৱীলৈ তীৰ্থযাত্ৰী কঢ়িয়াই অনা এখন বাছ বাগৰি যোৱাত এগৰাকী ২৭ বছৰীয়া মহিলাৰ মৃত্যু হোৱাৰ লগতে ২৪জন লোক আহত হৈছিল।
