মাত্ৰ ৬ ছেকেণ্ডৰ এক শ্বাসৰুদ্ধকৰ মুহূৰ্ত। সেই সময়ৰ ভিতৰতে আহমেদাবাদৰ মেঘানী নগৰৰ বি জে মেডিকেল কলেজৰ ইউ জি হোষ্টেলৰ মেছৰ চাদত ভাঙি পৰে এয়াৰ ইণ্ডিয়াৰ দুৰ্ঘটনাগ্ৰস্ত বিমানখন। জানিব পৰা মতে, বিমানখনত মুঠ ২৪২ জন লোক আছিল। ইয়াৰে ২৩২ জন যাত্ৰী আৰু ১০ জন ক্ৰু মেম্বাৰ।
বিমানখন দুৰ্ঘটনা সংঘটিত হোৱাৰ লগে লগে বিস্ফোৰণৰ ফলত বিমানখনত থকা সকলোৰে মৃত্যু হোৱা বুলি অনুমান কৰা হৈছে। এইটো ইয়াতেই শেষ নহয়, বিমান দুৰ্ঘটনাত ২০ জন কনিষ্ঠ চিকিৎসকৰো মৃত্যুৰ আশংকা কৰা হৈছে। দুৰ্ঘটনাগ্ৰস্ত বিমানখন ভাঙি পৰাৰ সময়ত চিকিৎসা মহাবিদ্যালয়ৰ কনিষ্ঠ চিকিৎসকসকলে কেন্টিনত খোৱাবোৱা কৰি আছিল।
আহমেদাবাদৰ স্থানীয় অঞ্চলত দুৰ্ঘটনাগ্ৰস্ত হয় লণ্ডন অভিমুখী বিমানখন। প্ৰশাসনিক সূত্ৰৰ পৰা জানিব পৰা মতে, আহমেদাবাদ বিমানবন্দৰৰ পৰা উৰণৰ পাঁচ মিনিটৰ পিছতে আহমেদাবাদৰ মেঘনী নগৰ অঞ্চলত দুৰ্ঘটনাগ্ৰস্ত হয় এয়াৰ ইণ্ডিয়াৰ বিমানখন।
বিমানখন দুৰ্ঘটনাগ্ৰস্ত হোৱা অট্টালিকাটো আহমেদাবাদ অসামৰিক চিকিৎসালয়ৰ ইন্টাৰ্ণ চিকিৎসকে ব্যৱহাৰ কৰিছিল। এই কথা প্ৰকাশ কৰিছে প্ৰশাসনৰ এক সূত্ৰই। অৱশ্যে ঘৰটোৰ ক্ষতিৰ পৰিসৰ জানিব পৰা হোৱা নাই।
স্থানীয় লোকৰ দাবী, হোষ্টেলত প্ৰায় ৫০ জন ইন্টাৰ্ণ বাস কৰিছিল। দুৰ্ঘটনাৰ সময়ত যিসকল লোক তাত আছিল তেওঁলোক সকলোৰে মৃত্যুৰ আশংকা কৰা হৈছে।
এয়াৰ ইণ্ডিয়াই জনোৱা মতে, বৃহস্পতিবাৰে দিনৰ ১:৩৮ বজাত আহমেদাবাদ বিমানবন্দৰৰ ২৩ নম্বৰ ৰাণৱেৰ পৰা বিমানখন উৰা মাৰিছিল। গন্তব্যস্থান আছিল লণ্ডনৰ ওচৰৰ গেটৱিক বিমানবন্দৰ। বিমানখনত ২৪২ জন যাত্ৰী আছিল। এতিয়ালৈকে কিমানজন লোকৰ মৃত্যু হৈছে সেই কথা আনুষ্ঠানিকভাৱে প্ৰকাশ কৰা নাই প্ৰশাসনে। অনুমান কৰা হৈছে যে বিমানখন দুৰ্ঘটনাগ্ৰস্ত হোৱা ঠাইতো বহু লোক আহত হৈছে।
স্থানীয় সংবাদ মাধ্যমৰ সূত্ৰ অনুসৰি অসামৰিক চিকিৎসালয়খনৰ ইন্টাৰ্ণ চিকিৎসকসকলে বিমানখন দুৰ্ঘটনাগ্ৰস্ত হোৱা মেঘনী অঞ্চলৰ বহুমহলীয়া অট্টালিকাটোত বাস কৰে। ইয়াৰ কাষতে থকা এটা অট্টালিকাত আৱাসী চিকিৎসকসকল থাকে। আটাইকেইজনেই আহমেদাবাদৰ অসামৰিক চিকিৎসালয়ত কৰ্মৰত আছিল।
