উত্তৰ আফ্ৰিকাৰ দেশ মৰক্কোত এক প্ৰবল ভূমিকম্প সংঘটিত হৈছে। এই ভূমিকম্পত এতিয়ালৈকে প্ৰায় ৩০০ লোক নিহত হোৱাৰ লগতে ১৫৩ জন লোক আহত হৈছে। হতাহতৰ সংখ্যা বৃদ্ধি পাব পাৰে বুলি আশংকা কৰা হৈছে।
শুকুৰবাৰে স্থানীয় সময় অনুসৰি ১১:১১ বজাত সংঘটিত হয় এই ভূমিকম্প। আমেৰিকাৰ ভূতাত্ত্বিক জৰীপ বিভাগে (ইউ এছ জি এছ) জনোৱা মতে, এই ভূমিকম্পৰ প্ৰাবল্য ৬.৮ আৰু ইয়াৰ উৎপত্তি হৈছে এটলাছ পৰ্বতৰ স্কি ৰিজ’ৰ্ট অকাইমেডেনৰ ওচৰত।
লগতে পঢ়ক: দুৰ্নীতিৰ গোচৰত গ্ৰেপ্তাৰ অন্ধ্ৰ প্ৰদেশৰ প্ৰাক্তন মুখ্যমন্ত্ৰী চন্দ্ৰবাবু নাইডু
ইউ এছ জি এছৰ তথ্য অনুসৰি এশ বছৰতকৈও অধিক সময়ৰ ভিতৰত মৰক্কোত হোৱা আটাইতকৈ শক্তিশালী ভূমিকম্পটো আছিল এইটোৱেই। ১৯০০ চনৰ পৰা তাত ৬ মাত্ৰাৰ কোনো ভূমিকম্প হোৱা নাই।
ভূমিকম্পৰ ফলত আটাইতকৈ বেছি ক্ষতিগ্ৰস্ত হৈছে পুৰণি মাৰাখেশ চহৰ। তাত বহু ঘৰ-বাৰী ভাঙি গৈছে। আৰু এই পুৰণি চহৰখনতে বেছিভাগ মানুহৰ মৃত্যু হৈছে। চহৰখন ভূমিকম্পৰ উৎপত্তিস্থলৰ অতি ওচৰত অৱস্থিত।
লগতে পঢ়ক: গুৱাহাটীত আলফা-স্বাধীনৰ নামত ধন দাবী কৰা ৩ জনক গ্ৰেপ্তাৰ
দেশখনৰ চৰকাৰী আল-আউলা টেলিভিছনে দেশখনৰ গৃহ মন্ত্ৰালয়ৰ উদ্ধৃতিৰে জনোৱা অনুসৰি এতিয়ালৈকে এই ভূমিকম্পত কমেও ২৯৬ জন লোক নিহত আৰু ১৫৩ জন লোক আহত হৈছে।
