বৃহৎ নদী বান্ধে মাতি আনিব পৰা ভয়াৱহ বিপদকলৈ বিভিন্ন সময়ত চৰ্চা হৈ থকাৰ সময়তে অসমৰ ডিমা হাচাও জিলাৰ কপিলী জলবিদ্যুৎ প্ৰকল্পত পানীৰ পাইপলাইনত ঘটা বিস্ফোৰণৰ ফলত নৰ্থ ইষ্টাৰ্ণ ইলেক্ট্ৰিক পাৱাৰ কৰ্পোৰেচন লিমিটেডৰ কমেও তিনিজন কৰ্মচাৰীৰ মৃত্যু হোৱাৰ আশংকা কৰা হৈছে।
শনিবাৰে পুৱা বিস্ফোৰণটো সংঘটিত হোৱাৰ পিছতে তীব্ৰ বেগেৰে পানী তললৈ নামি আহে।
জানিব পৰাৱ মতে পানীৰ সোঁতে সেই সময়ত তাত উপস্থিত থকা নিপকোৰ বহু কেইজন কৰ্মচাৰীক উটুৱাই লৈ যায়।
শেহতীয়াকৈ ঘটনাস্থলীৰ পৰা কেইবাটাও মৃতদেহ উদ্ধাৰ কৰা হৈছে। মৃত কৰ্মচাৰী কেইজন হৈছে ডিমাৰাজ জাহাৰী (ঠিকাভিত্তিক কৰ্মচাৰী), উপ প্ৰৱন্ধক অনুপম নাৰায়ণ আৰু প্ৰকল্পটোৰ মেনেজাৰ জয়ন্ত নাৰায়ণ ।
জানিব পৰা মতে ‘পেনষ্টক পাইপ’ত বিস্ফোৰণৰ ফলত তেওঁলোকে মৃত্যুক সাৱটি লয়।
পেনষ্টক পাইপে উমৰাংচো বান্ধৰ পৰা জলবিদ্যুৎ প্ৰকল্পটোলৈ পানী কঢ়িয়াই লৈ যায়।
প্ৰকল্পটোত ২০১৯ চনতো একে ধৰণৰ ঘটনা সংঘটিত হৈছিল। সেইবেলি চাৰিজন লোকৰ মৃত্যু ঘটিছিল।
