যোৱা ১২ আগষ্টৰ মাজনিশা যুৱ প্ৰজন্মৰ হাৰ্টথ্ৰব জুবিন গাৰ্গৰ সৈতে তৰ্কযুদ্ধত লিপ্ত হোৱা চাৰিগৰাকী এনএছইউআইৰ নেতাক আটক কৰিছে দিচপুৰ আৰক্ষীয়ে।
ছয়মাইলত এক সংবাদমেল সম্বোধন কৰাৰ পাছতে উক্ত স্থানত দিছপুৰ থানাৰ সহকাৰী আৰক্ষী আয়ুক্ত হিমাংশু দাসৰ নেতৃত্বত যোৱা আৰক্ষীৰ এটা দলে আটক কৰে তিনিওজনক। এখন সংবাদমেল সম্বোধন কৰাৰ পিছতে তেওঁলোকক আৰক্ষীয়ে আটক কৰে।
উক্ত ৪ গৰাকী যুৱক ক্ৰমে হীৰক জ্যোতি ৰাজবংশী, অৰূপ তালুকদাৰ, গীতাৰ্থ ডেকা আৰু দিশান্ত ৰাজবংশী।
উল্লেখ্য যে, বুধবাৰে জুবিন গাৰ্গৰ সৈতে সেই নিশা কি ঘটনা সংঘটিত হৈছিল এই প্ৰসংগত চাৰিওজনে সংবাদমেল সম্বোধন কৰিছিল।
ইপিনে, সংবাদমেল সম্বোধন কৰিবৰ বাবে জুবিন গাৰ্গৰ সৈতে হতাহত হোৱাৰ সময়ত ব্যবহৃত AS 01BY 0675 নম্বৰৰ বাহনখন লৈ আহিছে। বাহনখনৰ গৰাকী অভিযুক্ত হিৰকজ্যোতি ৰাজবংশী বুলি জানিব পৰা গৈছে।
আৰক্ষীয়ে উক্ত বাহনখন জব্দ কৰি দিছপুৰ থানালৈ লৈ যায়।
ইপিনে, ঘটনাস্থলীত সহকাৰী আৰক্ষী আয়ুক্ত হিমাংশু দাসে কোনোধৰণৰ জাননী আদালতৰ পৰা লাভ কৰা নাই বুলি কোৱাৰ লগতে অভিযুক্ত যুৱককেইজনক আৰক্ষীয়ে বিচাৰি ফুৰা বুলি উল্লেখ কৰে।
কিন্তু নৰ্থ ইষ্ট নাওৰ সাংবাদিকৰে সৈতে হোৱা টেলিফোনিক বাৰ্তালাপত সহকাৰী আৰক্ষী আয়ুক্তই বৰ্তমান অভিযুক্তকেইজনে আদালতৰ জামিনৰ নথি-পত্ৰ দেখুওৱা বুলি জানিবলৈ দিয়ে।
বাতৰি সংগ্ৰহ কৰাৰ সময়লৈকে যুৱককেইজনক সোধ-পোচ কৰি আছে আৰক্ষীয়ে।
ইপিনে, আটক কৰাৰ পূৰ্বে সংবাদমেলত জুবিন গাৰ্গৰ সৈতে বাক-বিতণ্ডাত লিপ্ত হৈ থকা এটা ভিডিঅ’ ভাইৰেল কৰে এনএছইউআইৰ সদস্যকেইজনে।
