ছিডনী টেষ্টত ভাৰতীয় বলাৰসকলে যোগ্য প্ৰত্যুত্তৰ দিছে। প্ৰথম দিনাই টিম ইণ্ডিয়াৰ ইনিংছ মাত্ৰ ১৮৫ ৰানতে শেষ হৈছিল। দিনটোৰ শেষত বুমৰাহে খোৱাজাক ওভতাই পঠিয়াইছিল। দ্বিতীয় দিনতো ভাৰতীয় বলাৰসকলে আধিপত্য অব্যাহত ৰাখিছিল। মাত্ৰ ১৮১ ৰানতে অষ্ট্ৰেলিয়াৰ ইনিংছ স্তদ্ধ কৰি দিয়ে।
অধিনায়ক বুমৰাহ, নীতিশ কুমাৰ ৰেড্ডীয়ে দুটাকৈ উইকেট লাভ কৰে। মহম্মদ চিৰাজ আৰু প্ৰসিদ্ধ কৃষ্ণই তিনিটাকৈ উইকেট দখল কৰে। ভাৰতে ৪ ৰানৰ গুৰুত্বপূৰ্ণ অগ্ৰগতি লাভ কৰে।
বৰ্ডাৰ-গাভাস্কাৰ ট্ৰফীত পুনৰ সমতা লাভ কৰিবলৈ হ’লে টিম ইণ্ডিয়াই এই টেষ্টত জয়ী হ’ব লাগিব। য’ত পাৰ্থ টেষ্টৰ পিছত ৰোহিত শৰ্মাৰ ঠাইত বুমৰাহক নেতৃত্ব দিয়া হৈছে। দ্বিতীয় দিনা ছিডনীৰ গ্ৰীণ কাৰ্পেটত ভাৰতীয় বলাৰসকলে অষ্ট্ৰেলিয়াৰ বেটছমেনসকলক সম্পূৰ্ণৰূপে বিধ্বস্ত কৰি পেলালে।
ভাৰতৰ অধিনায়কে আৰম্ভণি কৰিছিল। যেতিয়া অষ্ট্ৰেলিয়াৰ স্ক’ৰব’ৰ্ডত মাত্ৰ ১৫ ৰান আছিল, তেতিয়া বুমৰাহে লাবুছেনক ঘূৰাই পঠিয়াইছিল। ছেম কনষ্টাসক অলপ সময়ৰ ভিতৰতে ঘূৰাই পঠিয়ালে ছিৰাজে। প্ৰথম দিনটোৰ শেষত বুমৰাহৰ সৈতে বাক-বিতণ্ডাত লিপ্ত হৈছিল অষ্ট্ৰেলয়াৰ যুৱ বেটাৰগৰাকী। মুখ চলিল যদিও আজি বেট নচলিল। ট্ৰেভিছ হেডকো ছিৰাজে আউট কৰে। বৰ্তমানৰ ছিৰিজটোত এবাৰতকৈ অধিকবাৰ ভাৰতৰ মূৰৰ বিষ হৈ পৰিছে হেড। কিন্তু হেডে ছিৰাজৰ সন্মুখত মূৰ ওপৰলৈ তুলিব নোৱাৰিলে। মাত্ৰ ৪ ৰাণত উভতি গ’ল।
তাৰ পৰাই ষ্টিভ স্মিথে অষ্ট্ৰেলিয়াক পুনৰ মেচখনলৈ অনাৰ চেষ্টা কৰে। ব্যক্তিগত ৩৩ ৰানত তেওঁক ঘূৰাই পঠিয়ায় প্ৰসিদ্ধই। চলিত শৃংখলাত ভাৰতীয় পেচাৰগৰাকীয়ে প্ৰথমবাৰৰ বাবে সুযোগ লাভ কৰে। তেওঁ এলেক্স কেৰীকো আউট কৰে। বলিং কৰিবলৈ আহি নিৰাশ নহ’ল নীতিশ কুমাৰ ৰেড্ডীও। পেট কামিন্স আৰু মিচেল ষ্টাৰ্কৰ উইকেট দখল কৰি লৱাৰ অৰ্ডাৰ ভাঙি পেলায় নীতিশে।
তাৰমাজতে ৱেবষ্টাৰে সংগ্ৰাম চলাইছিল। তেওঁ অৰ্ধশতকো অৰ্জন কৰে। প্ৰসিদ্ধৰ বলত কেচ তুলি দি উভতি যায় ৱেবষ্টাৰ। তথাপিও দেখা গৈছিল যে অষ্ট্ৰেলিয়াই সামান্য অগ্ৰগতি লাভ কৰিব পাৰে। কিন্তু অষ্ট্ৰেলিয়াৰ আশাত পানী ঢালিলে ছিৰাজে। দুৰ্দান্ত ছুইঙেৰে স্কট ব’লেণ্ডৰ উইকেট দখল কৰি ভাৰতক ৪ ৰানৰ অগ্ৰগতি প্ৰদান কৰে।
কিন্তু চিন্তাও আছে ভাৰতৰ। আঘাতৰ বাবে বুমৰাহে খেলপথাৰ এৰিবলগীয়া হৈছিল। যদিও ভাৰতীয় বলাৰসকলে তেওঁৰ অবিহনেই কামটো কৰি পেলালে।
