নিউজিলেণ্ডৰ এগৰাকী মহিলা। মহিলাগৰাকীয়ে শেহতীয়াকৈ ভ্ৰমণ কৰিছিল অষ্ট্ৰেলিয়া। জুন আৰ্মষ্ট্ৰং নামৰ এইগৰাকী ৭৭ বছৰীয়া মহিলাই ব্রিছবেন অভিমুখী বিমানত উঠাৰ পূৰ্বে ক্ৰাইষ্টচাৰ্চ বিমানবন্দৰত গ্লুটেন মুক্ত চিকেন আৰু লেটুচ চেণ্ডুইচ আৰু মাফিন ক্ৰয় কৰিছিল।
ব্রিছবেনত বিমান অৱতৰণ কৰাৰ পিছতে নিয়মানুসাৰে মহিলাগৰাকীৰ বেগ পৰীক্ষা কৰা হয়। আৰু তেতিয়াই মহিলাগৰাকীৰ বেগত ওলায় বয়বস্তুৰ তালিকাত অন্তৰ্ভুক্ত নোহোৱা চেণ্ডুইচটো। চেণ্ডুইচটোৰ বিষয়ে তালিকাত উল্লেখ নকৰাৰ বাবেই মহিলাগৰাকীক বৃহৎ পৰিমাণৰ জৰিমনা বিহা হৈছে।
প্ৰকাশিত খবৰ অনুসৰি, প্ৰায় তিনি-চাৰি ঘণ্টাৰ যাত্ৰাত মহিলাগৰাকীয়ে চেণ্ডুইচটো খোৱাৰ কথা ভাবিছিল। কিন্তু বিমান যাত্ৰাৰ সময়তে আকস্মিকতে তেওঁৰ টোপনি আহে আৰু চেণ্ডুইচৰ কথা পাহৰি যায়।
ব্রিছবেনত উপস্থিত হোৱাৰ লগে লগে তেওঁ কাষ্টমছ ডিক্লেৰেশ্যন ফৰ্ম পূৰণ কৰে। প্ৰয়োজনীয় ঔষধ লগত অনাৰ বাবে তেওঁ এই পত্ৰ পূৰণ কৰিবলগীয়া হয়। কিন্তু বেগত থকা চেণ্ডুইচটোৰ কথা সম্পূৰ্ণৰূপে পাহৰি যায় মহিলাগৰাকীয়ে।
কাষ্টমছ ছিকিউৰিটিৰ মাজেৰে পাৰ হৈ যোৱাৰ সময়ত তেওঁৰ বেগটো পৰীক্ষা কৰা হয় আৰু বেগৰ ভিতৰত আৱিষ্কাৰ হয় অতিৰিক্ত চেণ্ডুইচটো। ইয়াৰ পিছতে চেণ্ডুইচটোৰ বিষয়ে তালিকাত উল্লেখ নকৰাৰ শাস্তি স্বৰূপে ৩৩০০ অষ্ট্ৰেলিয়ান ডলাৰ জৰিমনা বিহা হয় তেওঁক।
এই ধনৰাশিৰ ভাৰতীয় টকাৰ হিচাপত পৰিমাণ প্ৰায় ১,৬৪,৫১৩ টকা। আৰ্মষ্ট্ৰঙে প্ৰথমতে জৰিমনা সন্দৰ্ভত আপত্তি প্ৰকাশ কৰিছিল যদিও পৰিস্থিতিৰ গুৰুত্ব উপলব্ধি কৰাৰ লগে লগে তেওঁৰ বাধ্য হয় আৰু শেষত জৰিমনা ভৰিবলগীয়া হয়।
