ছিকিমে ২০১৯-২০ সন্তোষ ট্ৰফী ফুটবল প্ৰতিযোগিতাত ভাগ ল’ব নোৱাৰাটো ছিকিম ফুটবলৰ বাবে ক’লা দিন হিচাপে আখ্যা দিছে প্ৰাক্তন ভাৰতীয় ফুটবল দলৰ অধিনায়ক বাইচুং ভূটীয়াই।
ফুটবলাৰ গৰাকীয়ে সন্তোষ ট্ৰফীক ভাৰতীয় ফুটবল খেলুৱৈ সকলৰ বাবে এখন বৃহৎ মজিয়া বুলিও কয়।
চলিত সন্তোষ ট্ৰফীত ছিকিম দলৰ অনুপষ্ঠিতিয়ে ভালেকেইগৰাকী প্ৰতিভাৱান যুৱ ফুটবলাৰৰ ভবিষ্যতক অন্ধকাৰলৈ ঠেলি দিলে বুলিও ভূটীয়াই মন্তব্য কৰে।
কলকাতাত অনুষ্ঠিত হ’বলগীয়া যোগ্যতা অৰ্জনকাৰী খেলত ছিকিমে পূব মণ্ডলৰ বি গ্ৰুপত ছত্তীশগড় আৰু ঝাৰখণ্ডৰ সৈতে স্থান লাভ কৰিছিল।
সোমবাৰে ছিকিমে ছত্তীশগড়ৰ বিৰুদ্ধে প্ৰথমখন যোগ্যতা অৰ্জনকাৰী খেলত অংশ লোৱাৰ কথা আছিল।
আনহাতে, ছেপ্টেম্বৰৰ ২৭ তাৰিখে ঝাৰখণ্ডৰ সৈতে ছিকিমৰ দ্বিতীয়খন খেল আছিল।
এই সম্পৰ্কে বাইচুং ভূটীয়াই সংবাদ মাধ্যমক সম্বোধন কৰি কয় ‘‘সন্তোষ ট্ৰফী ২০১৯-২০ত ছিকিমে প্ৰথমখন খেলত অংশ ল’বলৈ নোপোৱাটো দুখৰ কথা’’।
প্ৰতিদ্বন্দ্বি দলটোৱে বিনা প্ৰতিদ্বন্দ্বিতাই ৱাক অভাৰ লাভ কৰিলে সেয়ে এইটো ছিকিম ফুটবলৰ বাবে এটা কলা দিন।
তেওঁ সমগ্ৰ ঘটনাটোক দুৰ্ভাগ্যজনক আখ্যা দিয়ে।
‘‘এইটো এটা অতি সামান্য বিষয় আছিল যাক অতি সহজে সমাধান কৰিব পৰা গ’ল হেতেন কিন্তু কিছু সংখ্যক লোকৰ ব্যক্তিগত আত্ম অহংকাৰৰ বাবে সমগ্ৰ বিষয়টো জটিল হৈ পৰিল’’-ভুটীয়াই কয়।
