বাংলাদেশৰ আক্ৰমণাত্মক বেটাৰ তথা আন্তঃৰাষ্ট্ৰীয় ক্ৰিকেটাৰ তামিম ইকবাল মেচ খেলি থকাৰ সময়তে হাৰ্ট এটেকত আক্ৰান্ত হয়। তেওঁৰ অৱস্থা সংকটজনক। অসুস্থ তামিমক চিকিৎসালয়ত লাইফ চাপৰ্টত ৰখা হৈছে।
ঘৰুৱা ক্ৰিকেট খেলৰ সময়ত তেওঁ হাৰ্ট এটেকত আক্ৰান্ত হয়। জনা যায় যে তেওঁ ঢাকা প্ৰিমিয়াৰ ডিভিজনত খেলি আছিল। সোমবাৰে এই ক্ৰিকেট লীগত শ্বাইনপুকুৰ ক্ৰিকেট ক্লাবৰ বিৰুদ্ধে ঢাকা মহামেদানৰ হৈ খেলত নামিছিল তামিমে।
টছত পৰাস্ত হৈ তামিমৰ দলটোৱে ফিল্ডিঙ কৰিবলৈ বাছি লয়। টছৰ কিছু সময়ৰ পিছতে মহামেদানৰ অধিনায়ক তামিম ইকবালৰ মেছিভ হাৰ্ট এটেক হয়। তেওঁ খেলপথাৰতে পৰি যায়।
ঘটনাৰ গুৰুত্ব বুজি খেলপথাৰলৈ অনা হয় এখন হেলিকপ্টাৰ। হেলিকপ্টাৰেৰে তেওঁক ঢাকালৈ অনাৰ চিন্তা কৰা হৈছিল। হেলিকপ্টাৰখন নমোৱাও হয়। কিন্তু তামিমৰ শাৰীৰিক অৱস্থাৰ অৱনতি ঘটাৰ লগে লগে তেওঁক ওচৰৰ চিকিৎসালয়লৈ লৈ যোৱা হয়। তেওঁক ঢাকাৰ সমীপৰ সাভাৰ অঞ্চলৰ ফজিলাটুননেছা হাস্পতাললৈ লৈ যোৱা হয়। তেওঁৰ অৱস্থা সংকটজনক।
তামিম ইকবালে ২০১০ চনৰ পৰা ২০১১ চনলৈ বাংলাদেশৰ জাতীয় ক্ৰিকেট দলৰ উপ-অধিনায়ক হিচাপে দায়িত্ব চম্ভালিছিল। আন্তঃৰাষ্ট্ৰীয় ক্ৰিকেটৰ তিনিওটা ফৰ্মেটতে তেওঁৰ শতক আছে। তেওঁ আন্তঃৰাষ্ট্ৰীয় ক্ৰিকেটত ১০ হাজাৰ ৰান সংগ্ৰহ কৰা প্ৰথমজন বাংলাদেশী হিচাপে পৰিগণিত হয়।
২০১১ চনত উইজডেন ক্ৰিকেটাৰ্ছৰ আলমানাক আলোচনীয়ে বছৰটোৰ পাঁচজন শ্ৰেষ্ঠ ক্ৰিকেটাৰৰ এজনহিচাপে নিৰ্বাচিত কৰিছিল তামিমক। গ্ৰেম শ্বোৱান আৰু বীৰেন্দ্ৰ ছেহৱাগক অতিক্ৰমি তামিমে এই খিতাপ দখল কৰে।
