পুনৰ পোহৰলৈ আহিছে এক ভয়ংকৰ ঘটনাৰ তথ্য। মহাৰাষ্ট্ৰত এগৰাকী ১৪ বছৰীয়া বাংলাদেশী নাবালিকাক দুই শতাধিক লোকে ধৰ্ষণ কৰে। একাধিক মধ্যভোগীক গ্ৰেপ্তাৰ কৰা হৈছে। মহাৰাষ্ট্ৰত যৌন চক্ৰৰ পৰা উদ্ধাৰ কৰা হৈছে বাংলাদেশী নাবালিকাগৰাকীক। অভিযোগ অনুসৰি যোৱা ৩ মাহত ২০০ৰো অধিক পুৰুষে ধৰ্ষণ আৰু যৌন নিৰ্যাতন চলাইছিল।
বাতৰি অনুসৰি, নাবালিকাগৰাকীয়ে স্কুলত এটা বিষয়ত ফেইল কৰি বাংলাদেশৰ ঘৰৰ পৰা পলায়ন কৰে। অৱশেষত ভাৰতৰ সীমান্তৰ সিপাৰে যৌন চক্ৰৰ লগত জড়িত হৈ পৰে। তাতেই তাইক মহাৰাষ্ট্ৰলৈ সৰবৰাহ কৰা হয়। শেহতীয়াকৈ মহাৰাষ্ট্ৰৰ পালঘৰ জিলাৰ পৰা উদ্ধাৰ কৰা হৈছে ১৪ বছৰীয়া নাবালিকাগৰাকীক।
বিষয়াসকলে জনোৱা মতে, বাংলাদেশী ভুক্তভোগীগৰাকীৰ ভাষ্য পৰীক্ষা কৰি থকা হৈছে। ইতিমধ্যে আৰক্ষীয়ে তদন্ত আৰম্ভ কৰিছে। এই পৰ্যন্ত ১০ জন লোকক গ্ৰেপ্তাৰ কৰা হৈছে। ইয়াৰে ৬ জন বাংলাদেশী। তদুপৰি, সৰবৰাহ কৰা আৰু ২ জন বাংলাদেশী গ্ৰেপ্তাৰ হোৱা লোকৰ ভিতৰত আছে।
এক্স’ডাছ ৰোড ইণ্ডিয়া ফাউণ্ডেশ্যন আৰু হাৰমনি ফাউণ্ডেশ্যনৰ যৌথ অভিযানত মীৰা ভয়াণ্ডাৰ ভাছাই-ভিৰা আৰক্ষীৰ এণ্টি হিউমেন ট্ৰেফিকিং ইউনিটে উদ্ধাৰ কৰে কিশোৰীগৰাকীক। যোৱা ২৬ জুলাইত ভাছাইৰ নাইগাঁৱৰ এটা ফ্লেটত তালাচী চলোৱাৰ পিছতে উদ্ধাৰ কৰা হয়। জানিব পৰা মতে, বিভিন্ন সময়ত কিশোৰীগৰাকীক মুম্বাই, পুনে, গুজৰাট আৰু কৰ্ণাটকলৈ সৰবৰাহ কৰা হৈছিল।
আৰক্ষীৰ সূত্ৰ অনুসৰি ঘৰৰ পৰা পলাই অহাৰ পিছত ভুক্তভোগীৰ চিনাকি এগৰাকী মহিলাই তাইক সীমান্ত পাৰ হৈ ভাৰতত প্ৰৱেশ কৰিবলৈ বাধ্য কৰে। তাৰ পিছত তাইক জোৰকৈ দেহ ব্যৱসায়ত নামিবলৈ বাধ্য কৰা হয় । আৰক্ষীয়ে সন্দেহ কৰিছে যে ছোৱালীজনীক হয়তো অকাল যৌৱন লাভ কৰিবলৈ হৰম’নৰ বেজী দিয়া হৈছিল আৰু টোপনিৰ বড়িও দিয়া হৈছিল।
পালঘৰ অভিযানৰ অন্তত আৰক্ষীয়ে গ্ৰেপ্তাৰ কৰিছে ১০জন লোকক। এই তালিকাত আছে মহম্মদ খালিদ আব্দুল, জুবাইৰ হাৰুণ শ্বেখ, ছামিম গাফুৰ চৰ্দাৰকে ধৰি বহুকেইজন। আৰক্ষীয়ে জনোৱা মতে, তেওঁলোকৰ বিৰুদ্ধে ভাৰতীয় দণ্ডবিধি, অনৈতিক সৰবৰাহ (প্ৰতিৰোধ) আইন, POCSO আইন, কিশোৰ ন্যায় আইন, বিদেশী আইন আৰু পাছপ’ৰ্ট আইনৰ অধীনত গোচৰ ৰুজু কৰা হৈছে।
