ৰাজ্যৰ ছয়টা পেছাদাৰী বাস্কেটবল দলৰ অংশগ্ৰহণেৰে দেওবাৰে গুৱাহাটীৰ নেহৰু ষ্টেডিয়ামৰ বাস্কেটবল ক’ৰ্টত আৰম্ভ হয় ৰাজ্যৰ প্ৰথম পেছাদাৰী বাস্কেটবল প্ৰতিযোগিতা “বাস্কেটবল চেলেঞ্জাৰ্ছ লীগ” (বি চি এল) ৷
অসম বাস্কেটবল সংস্থাৰ সহযোগত স্প’ৰ্টছক্ৰাফ্ট মেনেজমেণ্টে আয়োজন কৰা এই প্ৰতিযোগিতাখন উদ্বোধন কৰে বাস্কেটবল সংস্থাৰ সাধাৰণ সম্পাদক মুকুট মেধিয়ে ৷ অনুষ্ঠানত জ্যেষ্ঠ সাংবাদিক প্ৰণয় বৰদলৈ, আৰু কামৰূপ (মেট্ৰ’)ৰ অতিৰিক্ত উপায়ুক্ত পুলক মহন্তও উপস্থিত থাকে।
দেওবাৰৰ উদ্বোধনী খেলত এন এফ ৰে’লৱে (এ) দলে আই আই টি গুৱাহাটী দলৰ মুখামুখি হয় ৷ উল্লেখ্য যে লীগ তালিকাৰ শীৰ্ষ দুটা দলে প্ৰথম বি চি এল চেম্পিয়নৰ খিতাপ আৰু ১ লাখ টকাৰ প্ৰাইজমানিৰ বাবে ফাইনেল মেচত অৱতীৰ্ণ হ’ব ৷
আজি পাইৰেট্ছ দলে এন এফ ৰে’লৱে (বি), আই আই টি গুৱাহাটী দলে আছাম ৰাইনোজ আৰু এন এফ ৰে’লৱে (এ) দলে আছাম ছিক্সটিনৰ বিৰুদ্ধে অৱতীৰ্ণ হ’ব বুলি এটা বিবৃতিত স্প’ৰ্টছক্ৰাফ্টৰ সঞ্চালক ডৰিক ৰঞ্জন ডেকাই জানিব দিয়ে ৷
