অহা ১০ ডিচেম্বৰৰ পৰা তিনিওটা ফৰ্মেটৰ শৃংখলাত অংশ লোৱাৰ উদ্দেশ্যে দক্ষিণ আফ্ৰিকা ভ্ৰমণৰ বাবে সাজু হৈছে ভাৰতীয় দল। ইতিমধ্যে দক্ষিণ আফ্ৰিকা ভ্ৰমণৰ বাবে বিচিচিআয়ে ঘোষণা কৰিছে ভাৰতীয় দল।
এই ভ্ৰমণত ভাৰতীয় দলে ঘৰুৱা দলটোৰ বিপক্ষে তিনিখন এদিনীয়া, তিনিখন টি-২০ আৰু দুখন টেষ্টৰ দ্বিপাক্ষিক শৃংখলাত অৱতীৰ্ণ হ’ব। তিনিগৰাকী পৃথক পৃথক অধিনায়কৰ নেতৃত্বত তিনিওটা ফৰ্মেটত খেলপথাৰত নামিব ভাৰতীয় দল।
সীমিত অভাৰৰ শৃংখলাত ৰোহিত-কোহলীৰ দৰে তাৰকাৰ অনুপস্থিতিত বহুকেইজন যুৱ খেলুৱৈক দলত অন্তৰ্ভুক্ত কৰিছে নিৰ্বাচকে। লক্ষনীয়ভাৱে দক্ষিণ আফ্ৰিকাৰ পেচ বলিং সহায়ক উইকেটত এদিনীয়া দলটোত তেনে কোনো অভিজ্ঞ পেচাৰ নাথাকিব ভ্ৰমণত।
এই লৈ কিছু চৰ্চা চলি থকাৰ মাজতে ভাৰতৰ প্ৰাক্তন পেচাৰ আশীষ নেহৰাই কৰিছে এক তাৎপৰ্যপূৰ্ণ মন্তব্য। এই ভ্ৰমণৰ বাবে নিৰ্বাচকে ভাৰতৰ অভিজ্ঞ পেচাৰ ভুৱনেশ্বৰ কুমাৰক অন্তৰ্ভুক্ত নকৰাৰ বাবে কিছু ক্ষোভ প্ৰকাশ কৰিছে।
নেহৰাই কয় যে নিৰ্বাচকসকলে তিনিটা ভিন্ন দল নিৰ্বাচন কৰাত তেওঁ আচৰিত নহয়। প্ৰায় সকলো খেলুৱৈৰে নাম দলত অন্তৰ্ভুক্ত হৈছে। কিন্তু এনে এজন খেলুৱৈ থাকিব পাৰে, যাৰ নাম দলত অন্তৰ্ভুক্ত হোৱা নাই বুলি উল্লেখ কৰে নেহৰাই।
প্ৰাক্তন তাৰকাগৰাকীৰ মতে, ভুৱনেশ্বৰ কুমাৰৰ দৰে এজন বলাৰক দক্ষিণ আফ্ৰিকাৰ পৰিস্থিতিৰ প্ৰতি লক্ষ্য ৰাখি দলত অন্তৰ্ভুক্ত কৰিব পৰা গ’লহেঁতেন। দলত বহু বিকল্প পেচাৰ থাকিলেও ভুৱনেশ্বৰৰ প্ৰাসঙ্গিকতা থকা বুলি নেহৰাই কয়।
নেহৰাই কয় যে ভুৱনেশ্বৰ কুমাৰ এজন অভিজ্ঞ বলাৰ আৰু এতিয়াও তেওঁ ভাল প্ৰদৰ্শন কৰি আছে। নিৰ্বাচকসকলে তেওঁৰ ওপৰত চকু ৰাখিব লাগে। তেওঁলোকে ভুৱনেশ্বৰক পাহৰিব নালাগে। বিশেষকৈ টি-২০ আৰু এদিনীয়া ফৰ্মেটত ভুৱনেশ্বৰৰ পক্ষত মন্তব্য কৰে নেহৰাই।
উল্লেখ্য যে, উইকেটৰ দুয়োফালে চুইঙৰ দক্ষতাৰ লগতে নিখুঁত লাইন-লেংথৰ বাবে ভুৱনেশ্বৰ এসময়ত ভাৰতীয় বলিং লাইন আপৰ অন্যতম প্ৰধান অস্ত্ৰ আছিল। কিন্তু বিগত সময়ছোৱাত দলৰ পৰা বাহিৰত আছে তাৰকা পেচাৰগৰাকী।
ভাৰতীয় দলক ১২১ খন এদিনীয়া আৰু ৮৭ খন টি-২০ মেচত প্ৰতিনিধিত্ব কৰিছে ভুৱনেশ্বৰ কুমাৰে। কিন্তু বিগত বৰ্ষৰ ২১ জানুৱাৰীতে এদিনীয়াত আৰু ২২ নৱেম্বৰতে টি-২০ত অন্তিমবাৰৰ বাবে ভাৰতীয় দলৰ হৈ খেলপথাৰত নামিছিল তাৰকাগৰাকী।
