পূব লাডাখৰ গালোৱান ভেলীত ১৫ জুনৰ দিনা ভাৰতীয় সেনাক আক্ৰমণ কৰিবলৈ গৈ মৃত্যু ঘটিছিল শতাধিক চীনা সেনাৰ ।
এই দাবী ভাৰতে কৰা দাবী নহয়। এই দাবী কৰিছে খোদ চীনৰ সৈন্য বাহিনী পি এল এৰ প্ৰাক্তন বিষয়া এগৰাকীয়ে।
পি এল এৰ প্ৰাক্তন বিষয়া জিনালি য়াঙে বেইজিং প্ৰশাসনক শ’লঠেকত পেলাই এই বুলি কৈছে যে আভ্যন্তৰীণ বিদ্ৰোহৰ সূত্ৰপাত ঘটাৰ আশংকা কৰিয়েই চীনৰ ৰাষ্ট্ৰপতি ঝি জিংপিঙে গালোৱানত নিহত চীনা সেনাৰ প্ৰকৃত তথ্য লুকুৱাইছে।
গালোৱানত নিহত চীনা সেনাৰ প্ৰকৃত তথ্য প্ৰকাশ কৰিলে নিজৰ দলৰ ভিতৰতে বিদ্ৰোহৰ সূচনা হোৱাৰ আশংকা কৰিয়েই নিহত সৈনিকৰ সংখ্যা কমকৈ প্ৰকাশ কৰা বুলি কৈছে য়াঙে।
পি এল এৰ প্ৰাক্তন বিষয়া তথা চীনৰ কমিউনিষ্ট পাৰ্টীৰ এজন শীৰ্ষ নেতাৰ পুত্ৰ জিনালি য়াঙে প্ৰকাশ কৰা মতে চীনত এতিয়া ৰাষ্ট্ৰপতি ঝি জিংপিঙৰ জনপ্ৰিয়তা যথেষ্ট হ্ৰাস পাইছে।
ইয়াৰ মাজতে গালোৱানৰ প্ৰকৃত তথ্য প্ৰকাশ কৰি জিংপিঙে খাল খান্দি ঘঁৰিয়াল চপাব বিচৰা নাই।
ইপিনে মাৰ্কিন চোৰাংচোৱাৰ মতে গালোৱানত নিহত হৈছিল ৩৫ জন চীনা সেনা।
সংবাদ প্ৰতিষ্ঠানৰ মতে নিহতৰ সংখ্যা আছিল ৪৫।
