পুনৰ অসমত দেখা পোৱা গ’ল পুলিচী আতিশয্যৰ পৰিঘটনা৷ নিজৰ পেটৰ ভাতমুঠি মোকলাবৰ বাবে ডেলিভাৰী বয় হিচাপে কৰ্মৰত এজন ছাত্ৰৰ ওপৰত হিমন্ত পৰিচালিত পুলিচৰ আক্ৰমণ৷ আনকি জনহিত,জনসেৱাৰ্থে শ্ল’গান দিয়া অসম আৰক্ষীৰ উপ-পৰিদৰ্শকে মৃত্যুৰ ভাবুকি দিলে সদ্যস্নাতক ছাত্ৰক৷
ঘটনা অনুসৰি কালি অৰ্থাৎ শুকুৰবাৰে পাণবজাৰ থানাৰ অধীনস্থ ফাঁচীবজাৰত জ’মেটোৰ ডেলীভাৰী সংক্ৰান্তত এটা ন’ এন্ট্ৰিত ভুক্তভোগী ছাত্ৰজনে প্ৰৱেশ কৰাত ছাত্ৰজনৰ বিৰুদ্ধে আক্ৰমণাত্মক হৈ পৰে পাণবজাৰ থানাৰ ভাৰপ্ৰাপ্ত বিষয়া ভাৰ্গৱ বৰবৰা৷
ভুক্তভোগী ছাত্ৰজন কটন বিশ্ববিদ্যালয়ৰ প্ৰাক্তন ছাত্ৰ তথা কটনৰ অৰ্থনীতি বিভাগৰ স্নাতক জ্ঞানদীপ হাজৰিকা বুলি জানিব পৰা গৈছে।পিতৃহাৰা জ্ঞানদীপৰ বয়স ২১বছৰ,ঘৰ শোণিতপুৰ জিলাত।
ঘৰৰ অৱস্থাৰ বাবে পেটৰ তাড়নাত মহানগৰীত জীৱন সংগ্ৰাম চলাই নিছিল মেধাৱী জ্ঞানদীপে। ইতিমধ্যে জ্ঞানদীপক আক্ৰমণ কৰা আৰক্ষী বিষয়াজনক তাৎক্ষণিকভাৱে নিলম্বন কৰি উচ্চস্তৰীয় তদন্ত কমিটি ঘোষণা কৰিছে আৰক্ষী সঞ্চালক প্ৰধান জ্ঞানেন্দ্ৰ প্ৰতাপ সিঙে৷
কিন্তু এইখিনিতে প্ৰশ্ন হৈছে যে,দাগী অপৰাধীৰ কান্ধত হাত থৈ গোৱাত ফটোশ্বুট কৰা অসম আৰক্ষী সদায় আৰ্তজনৰ বিৰুদ্ধে সদায় সৰৱ কিয়? দুৰ্বলীৰ ওপৰতহে নিজৰ শক্তি প্ৰদৰ্শন কৰিহে বীৰত্ব দেখুৱাব পাৰে নেকি হিমন্ত বিশ্বৰ আৰক্ষীয়ে? এইসমূহ প্ৰশ্ন বৰ্তমান অসমৰ সচেতন নাগৰিকৰ মনত উদয় হৈছে৷
