সমগ্ৰ বিশ্বতে প্ৰতি গৰাকী লোক বৰ্তমান ক’ৰ’না ভাইৰাছক লৈ আতংকিত আৰু সতৰ্ক হৈ পৰিছে। এই ক’ৰ’না ভাইৰাছক লৈ বিশেষ সতৰ্কতা অৱলম্বন কৰিছে ভাৰতৰ চুবুৰীয়া ৰাষ্ট্ৰ ভূটানেও।
ইষ্টাৰ্ন ভূটানৰ চামদ্ৰুপ ঝংখাৰত অৱলম্বন কৰা হৈছে এই বিশেষ সতৰ্কতা। ভাৰত-ভূটান সীমান্তৰ চামদ্ৰুপ ঝংখাৰৰ প্ৰৱেশ দ্বাৰত প্ৰতিগৰাকী ভাৰতীয়ই হওক বা ভূটানীয়ে হওক বা অন্য বিদেশী পৰ্যটকেই হওক, প্ৰতি গৰাকী লোকক চামদ্ৰুপ ঝংখাৰৰ প্ৰৱেশ দ্বাৰত ভূটান আৰক্ষীয়ে ভূটানৰ চিকিৎসকৰ দল আৰু ইমাইগ্ৰেছন কাৰ্য্যালয়ৰ কৰ্মচাৰীৰ উপস্থিতিত পৰীক্ষা কৰিছে।
এটা পিষ্টল সদৃশ যন্ত্ৰ মানুহৰ কপালত আৰু চকুৰ সম্মুখত লগাই দি ক’ৰ’না ভাইৰাছ আক্ৰান্ত হয় নে নহয় পৰীক্ষা কৰা হৈছে আৰু তাৰ পিছতহে দেশখনত প্ৰৱেশ কৰিবলৈ দিয়া হৈছে।
ইয়াৰ বিপৰীতে কিন্ত ভূটানৰ পৰা ভাৰতত প্ৰৱেশৰ সময়ত ভূটানী নাগৰিকক বা ভূটান ৰাষ্ট্ৰৰ কোনো নাগৰিককে পৰীক্ষা কৰা হোৱা নাই। এই ক্ষেত্ৰত ভাৰততকৈ ভূটান স্বাস্থ্যৰ ক্ষেত্ৰত অধিক সচেতন বুলি বিভিন্নজনে মন্তব্য কৰিছে।
ইফালে, ভাৰতে ক’ৰ’না ভাইৰাছৰ ক্ষেত্ৰত সতৰ্কতা অৱলম্বন নকৰাক লৈ তীব্ৰ প্ৰতিক্ৰিয়া প্ৰকাশ কৰিছে ভাৰত-ভূটান সীমান্তৰ নাগৰিক সকলে।
