তামুলপুৰত বিহুদল কঢ়িয়াই অনা বাহন দুৰ্ঘটনাগ্ৰস্ত; ঘটনাস্থলীতে মৃত্যু বিহু নৃত্যশিল্পী যুৱতীৰ
তামুলপুৰ জিলাৰ তামুলপুৰ–নাগ্ৰীজুলি পথৰ কাষৰ নাওকাটাত মাজ নিশা সংঘটিত শোকাবহ পথ দুৰ্ঘটনাত এগৰাকী ২৫ বছৰীয়া বিহু নৃত্যশিল্পী যুৱতী নিহত হোৱাৰ লগতে আন এঘাৰজন আহত হয়। ইয়াৰে পাঁচজনৰ অৱস্থা সংকটজনক বুলি কোৱা হৈছে।
নলবাৰীৰ টিহৰ হাৰিভাঙাৰ পৰা ‘ভাস্কৰজ্যোতি বিহু হুঁচৰি দল’টো তামুলপুৰৰ বঙালীপাৰাত চলি থকা ৰঙালী বিহু উদযাপনত অনুষ্ঠান পৰিবেশন কৰিবলৈ গৈ থকা অৱস্থাত এই দুৰ্ঘটনা সংঘটিত হয়।
বাহনখনে বিপৰীত দিশৰ পৰা আহি থকা পিবি ০৩ এপি ৬৬৮১ নম্বৰৰ পঞ্জীয়ন নম্বৰৰ দ্ৰুতবেগী ট্ৰেইলাৰৰ সৈতে মুখামুখিকৈ সংঘৰ্ষত লিপ্ত হোৱা বুলি জানিব পৰা গৈছে।
তামুলপুৰ জিলাৰ নিজ ঝাৰগাঁৱৰ নিশামণি হালৈ নামৰ যুৱতীগৰাকীৰ দুৰ্ঘটনাস্থলীতে মৃত্যু হোৱা বুলি জানিব পৰা গৈছে।
আৰক্ষীয়ে জনোৱা মতে, সংঘৰ্ষৰ সময়ত এ এছ-২৫-ডি চি-৫৮৯৩ নম্বৰৰ পঞ্জীয়ন নম্বৰ থকা ট্ৰেভেলাৰখনে বিহু দলৰ ত্ৰিশজন সদস্য কঢ়িয়াই লৈ আনিছিল।
দুৰ্ঘটনাটোত আহতসকলৰ ভিতৰত আছে অৰুণ মেধি, বিদ্যুৎ দাস, জগত ৰায়, চালক পংকজ বৈশ্য, অংকিতা দাস, ৰতন কলিতা, নিতু বৰুৱা, শিৱানী বৰুৱা, কাব্যশ্ৰী সাৰুৱা আৰু দিবাকৰ মৰাণ।
আহতসকলৰ ভিতৰত সংকটজনক ৫ জনক উন্নত চিকিৎসাৰ বাবে গুৱাহাটী চিকিৎসা মহাবিদ্যালয় হাস্পাতললৈ প্ৰেৰণ কৰা হৈছে।
বিহু উদযাপনৰ মাজতে এই ঘটনাই অঞ্চলটোত শোকৰ ছাঁ পেলাইছে। স্থানীয় ৰাইজে যুৱ নৃত্যশিল্পীগৰাকীৰ অকাল মৃত্যুত শোক প্ৰকাশ কৰিছে। সংঘৰ্ষৰ কাৰণ ঘটনাৰ পৰিস্থিতি সন্দৰ্ভত আৰক্ষীয়ে তদন্ত আৰম্ভ কৰিছে।