নিৰ্বাচনৰ মহা ঢৌ ইতিমধ্যে শাম কাটিছে।
লকডাউনৰ আশংকাত এতিয়া ৰাজ্যবাসী। তাৰ মাজতে চেনেহৰ ৰঙালী বিহুক আদৰাৰ বাবে ৰাজ্যবাসীয়ে চলাইছে প্ৰস্তুতি।
ঢোল, পেঁপাৰ মাতত এতিয়া চৌদিশ মুখৰিত। বিহুৱা, বিহুৱতীসকল ব্যস্ত বিহুৰ আখৰাত।
গাঁৱৰ জীয়াৰী, বোৱাৰীসকল ব্যস্ত গামোচা বোৱাত; আপোনজনক প্ৰদান কৰিবলৈ।
ইয়াৰ মাজতে যোৰহাট জিলাৰ টীয়ক বলমা লাহন গাঁৱৰ বিশ্বজিৎ লাহন নামৰ এজন যুৱকৰ কৰ্মই মোহিছে সকলোকে।
তাঁতশালত ব্যস্ত বিশ্বজিতে কামৰ সৰু-বৰ নাই বুলি অনুধাৱন কৰি বহিঃৰাজ্যৰ আমদানিকৃত গামোচাৰ প্ৰয়োভৰ ৰোধৰ বাবে সকলোৱে এনে প্ৰয়াস অব্যাহত ৰখাৰ আহ্বান জনাইছে।
লগতে সততে সামাজিক মাধ্যমত তথা ৰাজপথত জাতীয়তাবাদৰ পৰিচয় দিব খোজাসকলক হাতে কামে লাগি প্ৰকৃত জাতীয়তাবাদ প্ৰতিষ্ঠাৰ বাবে এনেদৰে আত্মনিয়োগ কৰিবলৈ আহ্বান জনায় লগতে এই মানসিকতাই গ্ৰাম্য অৰ্থনীতিকো সৱল কৰিব বুলি আশা প্ৰকাশ কৰিছে বিশ্বজিতে।
উল্লেখযোগ্য যে বিশ্বজিতৰ এয়া প্ৰথম প্ৰচেষ্টা সেয়ে এইবাৰ উৎপাদিত গামোচা বিক্ৰী নকৰি গাঁৱৰ হুঁচৰিত পৰম্পৰা ৰক্ষা কৰি বস্ত্ৰ দান কৰিব।
