ডিগবৈত ১৭ ফেব্ৰুৱাৰিত এটা অনুষ্ঠানত ভাগ ল’বলৈ গৈ সমষ্টিটোৰ বিজেপি বিধায়ক সুৰেন ফুকনে নিজৰ অভব্য আচৰণৰ বিনিময়ত পালে একেই অভব্য ব্যৱহাৰ। কেৱল অভব্য ব্যৱহাৰেই নহয়, বিধায়কজনৰ ফালে চোঁচা লৈ তেওঁৰ একেবাৰে মুখৰ ওচৰত আঙুলি ৰাখি কথা কয় যুৱকজনে। সাহসী যুৱকজন আটছাৰ তিনিচুকীয়া জিলা শাখাৰ সহকাৰী সম্পাদক বিকি তাঁতী বুলি জানিব পৰা গৈছে।
প্ৰথমে ভালমতে উন্নয়নৰ কৈফিয়ৎ বিচাৰি এটা পথৰ প্ৰসংগ অনা যুৱকজনক বিজেপি বিধায়কজনে পথটো ‘তোৰ বাপেৰে বনাইছে’ বুলি কোৱাৰ লগে লগে যুৱকজন জ্বলি-পকি উঠে আৰু চোঁচা লয় বিধায়কজনৰ ফালে।
অতিশয় অপমানিত আৰু অসহায় বোধ কৰা বিজেপি বিধায়কজনে যুৱকজনক গালি-গালাজ কৰাৰ লগতে সভাস্থলীৰ পৰা খেদি পঠিয়াবলৈ নিৰ্দেশ দিয়ে নিজৰ লগত থকা আৰক্ষীক।
যুৱকজনে বিধায়কজনক চকুৰ ওচৰত আঙুলি থৈ স্পষ্টকৈ কয়, ‘বাপেৰৰ নাম নল’বি’, ‘এম এল এ হৈছ এম এল এ হৈ থাক বুইছ’, ‘বাপেৰৰ নাম নল’বি তই’, ‘এম এল এ হৈ থাক’।
জানিব পৰামতে বিজেপি বিধায়কজনে জন-ধন পুৰস্কাৰ মেলাত মঞ্জুৰি পত্ৰ বিলাবলৈ তাত উপস্থিত হৈছিল।
সমষ্টি উন্নয়নৰ নামত একো নকৰা বিধায়কজনৰ প্ৰতি বিতুষ্ট হৈ থকা স্থানীয় ৰাইজে ঘটনাটোৰ পিছত যুৱকজনক সমৰ্থন দিয়ে আৰু বিধায়কজনক এনে অভব্য আচৰণ নকৰিবলৈ সকীয়াই দিয়ে। আটছাৰ আন এজন বিষয়ববীয়াই আটছাৰ গাত হাত দিলে বিধায়কজনে ইয়াৰ ফল ভুগিব লাগিব বুলি সংবাদ মাধ্যমৰ আগত মন্তব্য কৰে।
ইপিনে নিজৰ ক্ষমতা থকা বাবেই ৰাজহুৱা স্থানত এজন যুৱকৰ প্ৰতি এনে অশোভনীয় শব্দ প্ৰয়োগ কৰি নিজৰ মান-সন্মান হেৰুওৱা ঘটনাই চৰ্চা লাভ কৰিছে অঞ্চলটোত। ঘটনাটোৰ ভিডিঅ’টো ইতিমধ্যে ভাইৰেল হৈছে।
