বিজেপিৰ বিৰুদ্ধে আন এক বিস্ফোৰক অভিযোগ উত্থাপন কৰিছে কৰ্ণাটকৰ মুখ্যমন্ত্রী ছিদ্দাৰামায়াই।
মুখ্যমন্ত্ৰীগৰাকীয়ে অভিযোগ উত্থাপন কৰে যে কৰ্ণাটকৰ কংগ্ৰেছ চৰকাৰৰ পতন ঘটাবলৈ বিজেপিয়ে কংগ্ৰেছৰ ৫০ গৰাকী বিধায়কক ৫০ কোটি টকা দিয়াৰ প্ৰলোভন দিছিল।
তেওঁ দাবী কৰে যে চৰকাৰ ভঙাৰ চেষ্টাত ব্যৰ্থ হোৱাৰ বাবে বিজেপিয়ে তেওঁৰ বিৰুদ্ধে দুর্নীতিৰ ভুৱা অভিযোগ আনিছে।
মহীশূৰৰ এখন সভাত কালি মুখ্যমন্ত্ৰীগৰাকীয়ে কয়- “৫০ গৰাকী বিধায়কক ৫০ কোটি টকাকৈ দিবলৈ বিজেপিয়ে ইমান টকা ক’ৰ পৰা পালে? বিজেপিয়ে নোট ছপা কৰে নেকি? আচলতে এইবোৰ দুৰ্নীতিৰ টকা।”
লগতে তেওঁ কয় যে বিজেপিয়ে আমাৰ দলৰ নেতাসকলক কিনিব নোৱাৰিলে। আমাৰ বিধায়ক সকল টকাৰ প্ৰলোভনত ভোল নাযায়। টকাৰ জোৰত চৰকাৰ ভাঙিব নোৱাৰি এতিয়া মোৰ বিৰুদ্ধে দুৰ্নীতিৰ ভুৱা অভিযোগ আনিছে।
উল্লেখ্য যে চৰকাৰী মাটিৰ নথি-পত্ৰ সলনি কৰি পত্নীৰ নামত মহীশূৰ নগৰ উন্নয়ন সংস্থাৰ আবাসন প্রকল্পত কম দামত মাটি ক্ৰয় কৰাৰ অভিযোগ আছে মুখ্যমন্ত্ৰী ছিদ্দাৰামায়াৰ বিৰুদ্ধে। ইডিয়ে এই গোচৰৰ তদন্ত চলাই আছে।
