এতিয়া সমগ্ৰ দেশতে চলিছে ৰাম ৰাজ্য প্ৰতিষ্ঠাৰ দাবীৰে বিজেপিৰ নিৰ্বাচনী প্ৰচাৰ। চাৰিওফালে ৰাম ৰাজ্যৰ সপোন দেখুৱাই জনতাৰ কণ্ঠৰোধ কৰাৰো প্ৰচেষ্টা চলি আছে সমান্তৰালভাৱে। নকলেও চলে, ৰাম মন্দিৰৰ প্ৰাণ প্ৰতিষ্ঠা এতিয়া যেন প্ৰধানমন্ত্ৰী নৰেন্দ্ৰ মোদীৰ আত্মপ্ৰতিষ্ঠাৰ অস্ত্ৰহে হৈ পৰিছে। কাৰো কথা শুনিবলৈ যেন ধৈৰ্য নাই, কাৰো অভিযোগ শুনিবলৈ সাহস নাই আৰু বিৰোধিতা মানেই টেটু চেপাৰ, অসহিষ্ণু হৈ উঠাৰো যেন বিকল্প নাই।
ইতিমধ্যে বিৰোধীক সন্ত্ৰস্ত কৰি ৰখাৰ সকলো উপায় সাজু। কেন্দ্ৰীয় সংস্থাৰ তদন্তৰ নামত বিৰোধীক একপ্ৰকাৰ শংকিত কৰি তোলাৰ চেষ্টা কৰা হৈছে। ধৰ্মৰ নামত দেশৰ জনসাধাৰণক মেৰুকৰণ কৰি নিৰ্বাচনী বৈতৰণী পাৰ হোৱাৰ চেষ্টাত কোনো ত্ৰুটি কৰা নাই বিজেপিয়ে। কিন্তু ন্যায় ক’ত?
অসমত চলি আছে ভাৰত জোড়ো ন্য়ায় যাত্ৰা। দেওবাৰে এই যাত্ৰাত আক্ৰমণ চলোৱা হয়। এই ঘটনাত প্ৰদেশ কংগ্ৰেছৰ সভাপতি ভূপেন কুমাৰ বৰা আহত হৈছে। কংগ্ৰেছৰ সাধাৰণ সম্পাদক জয়ৰাম ৰমেশে দাবী কৰে যে তেওঁৰ গাড়ীতো আক্ৰমণ কৰা হৈছে।
![](https://assam.nenow.in/wp-content/uploads/2024/01/Rahul-Gandhi-In-Bharat-Jodo.png-2-300x164.png)
অসম কংগ্ৰেছে কৈছে এয়া অসমৰ ৰাজনৈতিক ইতিহাসৰ অন্যতম নিন্দনীয় ঘটনা। হিমন্ত বিশ্বশৰ্মাৰ পোহনীয়া গুণ্ডাই এই আক্ৰমণ সংঘটিত কৰিছে। ইয়াৰ দ্বাৰা মুখ্যমন্ত্ৰী যে শংকিত হৈ পৰিছে তাৰেই ইংগিত পোৱা গৈছে।
ভূপেন বৰাই কৈছে, “আজি তেওঁলোকে মোৰ তেজ বোৱালে।মই তেজৰ দাগ লগা কাপোৰখিনি ৰাখি দিছো। এইটোৱে মোক আজিৰ আঘাতৰ কথা মনত পেলাই দিব।‘’
জয়ৰাম ৰমেশে এটা ভিডিঅ’ শ্বেয়াৰ কৰিছে। তাত লিখিছে, “মোৰ গাড়ীতো আক্ৰমণ কৰা হৈছিল। বিজেপিৰ মানুহে এইটো কৰিছে। গাড়ীৰ সন্মুখৰ পৰা ভাৰত জোড়ো ন্যায় যাত্ৰাৰ ষ্টীকাৰ ফালি পেলাইছে। তেওঁলোকে পানীৰ বটল দলিয়াই দিছে, এই যাত্ৰাৰ বিৰুদ্ধে শ্লোগান দিছে। কিন্তু আমি আগবাঢ়ি গৈছো। অসমৰ মুখ্যমন্ত্ৰীয়ে এই যাত্ৰা বন্ধ কৰিব নোৱাৰে। আমি আগবাঢ়ি যাম।”
কিন্তু এই বাৰ্তাৰ প্ৰত্যুত্তৰত মুখ্যমন্ত্ৰী হিমন্ত বিশ্বশৰ্মাই মাথোঁ লিখিছে, “অনুগ্ৰহ কৰি গোচৰ ৰুজু কৰক, অসমৰ ডিজিপিয়ে ইয়াৰ তদন্ত কৰিব।” লক্ষণীয়ভাৱে এই ঘটনা সংঘটিত হোৱা শোণিতপুৰ জিলাত আৰক্ষী অধীক্ষক হিচাপে দায়িত্বত আছে মুখ্যমন্ত্ৰী হিমন্ত বিশ্ব শৰ্মাৰ ভাতৃ সুশান্ত বিশ্ব শৰ্মা।
![](https://assam.nenow.in/wp-content/uploads/2024/01/c3f8a774-a2dc-4a32-94a2-85a37f2e9db6-300x150.jpg)
ঘটনা ইয়াতেই শেষ নহয়, বিজেপিৰ বাহিনীয়ে ৰাহুল গান্ধীৰ ভাৰত জোড়ো যাত্ৰাৰ বাছখনো আগুচি ধৰি শ্লগান দিয়ে। তেওঁলোকে দৰাচলতে ৰাহুল গান্ধীক প্ৰৰোচিত কৰিবলৈ চেষ্টা কৰে।
পিছত ৰাহুল গান্ধীয়ে কয়, এদল যুৱকে বিজেপিৰ পতাকা লৈ মোৰ বাছখন ৰখাই দিলে। ২০-২৫ জন বিজেপি কৰ্মী আমাৰ বাছৰ সন্মুখত লাঠি লৈ আহিল। মই বাছৰ পৰা নামি যোৱাৰ পিছত তেওঁলোক পলাই গ’ল। তেওঁলোকে ভাবিছিল যে কংগ্ৰেছে বিজেপি আৰু আৰএছএছক ভয় কৰিব। তেওঁলোকে কি সপোন দেখিছে। তেওঁলোকে যিমান বিচাৰে সিমান পোষ্টাৰ, প্লেকাৰ্ড ফালিব পাৰে। আমি কাকো ভয় নকৰো। আমি প্ৰধানমন্ত্ৰী নৰেন্দ্ৰ মোডী বা অসমৰ মুখ্যমন্ত্ৰীক ভয় নকৰো।”
অসমত ভাৰত জোড়ো ন্যায় যাত্ৰাত বাধা দিয়াৰ সৰ্বাত্মক প্ৰয়াস চলোৱা হৈছে। কিন্তু কংগ্ৰেছেও ইয়াক প্ৰত্যাহ্বান হিচাপে গ্ৰহণ কৰি যাত্ৰা আগবঢ়াই নিয়াৰ সংকল্প লৈছে। কংগ্ৰেছৰ ৰাষ্ট্ৰীয় সভাপতি মল্লিকাৰ্জুন খৰ্গেই কয় যে বিজেপিয়ে ভয় খাইছে আৰু আমাৰ প্ৰদেশ কংগ্ৰেছৰ সভাপতিৰ ওপৰত আক্ৰমণ চলাইছে। কিন্তু তেওঁ ভয় খোৱা নাই। আমি ব্ৰিটিছক যত ভয় খোৱা নাছিলো, বিজেপিক কিয় ভয় কৰিম। তেওঁ দেশৰ কাৰণে কংগ্ৰেছে কৰা ত্যাগৰ কথাও উনুকিয়ায়। ব্ৰিটিছৰ বিৰুদ্ধে কংগ্ৰেছৰ ত্যাগৰ বিপৰীতে আৰ এছ এছ-হিন্দু মহাসভা, মুছলীম লীগ আদিয়ে ব্ৰিটিছৰ আগত নতঃমস্তক হৈছিল।
তেওঁ হিমন্ত বিশ্ব শৰ্মাক কটাক্ষ কৰি কয় যে `হামাৰে বিল্লি হামে মেও ‘। হিমন্ত বিশ্ব কংগ্ৰেছত থাকিয়েই নেতা হোৱাৰ পিছত এতিয়া সেই কংগ্ৰেছকে চকু দেখুৱাবলৈ লৈছে, তেওঁক ভয় খোৱাৰ প্ৰশ্নই নাই।
![](https://assam.nenow.in/wp-content/uploads/2024/01/Rahul-Gandhi-In-Bharat-Jodo-300x164.png)
অসমত বিজেপি কৰ্মীয়ে সকলো সীমা অতিক্ৰম কৰি ভাৰত ন্যায় জোড়ো যাত্ৰাৰ বিৰুদ্ধে উঠিপৰি লাগিছে। কিন্তু ৰাহুল গান্ধীয়ে ইয়াৰ প্ৰত্যুত্তৰো দিছে অতি দক্ষতাৰে। বিজেপি কৰ্মীয়ে যেতিয়া তেওঁৰ বিৰুদ্ধে আক্ৰমণাত্মক হৈ পৰিছে, তেতিয়া তেওঁ তেওঁলোকৰ প্ৰতি ফ্লাইং কিচ প্ৰদৰ্শন কৰি প্ৰেমৰ বাৰ্তা দিয়ে। কিন্তু ৰাহুল গান্ধী শংকিত নহৈ গাড়ী ৰখাই ভিৰৰ মাজলৈ নামি যায়। সেই সময়ত তেওঁৰ নিৰাপত্তাৰক্ষীয়ে তেওঁক বাছলৈ উভতি যাবলৈ পৰামৰ্শ দিয়ে।
এইখিনিতে সচেতন পক্ষই কব খোজে যে ৰাহুল গান্ধীয়ে এইক্ষেত্ৰত কিছু সংযম ৰক্ষা কৰা উচিত। কিয়নো বিজেপিৰ উচটনিত তেওঁ এনেদৰে আগ্ৰাসী হৈ নিৰাপত্তা বেষ্টনীৰ বাহিৰলৈ গ’লে পৰিস্থিতি বিপৰীতমুখী হব পাৰে। কিয়নো মুখ্যমন্ত্ৰী হিমন্ত বিশ্ব শৰ্মাক দেশৰ আটাইতকৈ ভ্ৰষ্ট মুখ্যমন্ত্ৰী বুলি অভিহিত কৰাৰ পিছত মুখ্যমন্ত্ৰীয়ে এই যাত্ৰাত কোনো নিৰাপত্তা নিদিয়াৰ কথা ঘোষণা কৰিছে। সেইদৰে, বিজেপি বাহিনীয়ে এইদৰে কংগ্ৰেছক প্ৰৰোচিত কৰি পৰিস্থিতি উত্তাল কৰি সাম্প্ৰদায়িক মেৰুকৰণ শক্তিশালী কৰাৰ চেষ্টা চলাই আছে।
বিজেপিয়ে ৰাম মন্দিৰৰ প্ৰাণ প্ৰতিষ্ঠা উদযাপনৰ পৰাই দেশত এক ব্যাপক নিৰ্বাচনী প্ৰচাৰৰ বাবে সাজু হৈছে। ইয়াৰ বিপৰীতে কংগ্ৰেছে দেশৰ গণতন্ত্ৰ আৰু সংবিধান ৰক্ষাৰ বাবে জন সাধাৰণক আহ্বান জনাই প্ৰচাৰত নামিছে। এই মুহূৰ্তত বিজেপিৰ একমাত্ৰ লক্ষ্য হৈছে লোকসভা নিৰ্বাচন আৰু তাৰবাবে সৰ্বশক্তিৰে যুঁজত নামিছে। ৰাম মন্দিৰক কেন্দ্ৰ কৰিয়েই বিজেপিয়ে দেশত এক আলোড়ন তোলাৰ চেষ্টা কৰিছে আৰু জনসাধাৰণক মোহগ্ৰস্ত কৰি ৰখাৰ কামত ব্ৰতী হৈছে।
![](https://assam.nenow.in/wp-content/uploads/2024/01/Bharat-Jodo-300x164.png)
এই মুহূৰ্তত বিৰোধী দলৰ বিশেষকৈ ৰাহুল গান্ধীৰ নেতৃত্বত কংগ্ৰেছৰ কাৰ্যসূচীৰ ওপৰত সকলোৰে দৃষ্টি নিবদ্ধ হৈছে আৰু সেইবাবেই কিছু শংকিত হৈ বিজেপিয়ে পৰিৱেশটোক ধৰ্মীয় মেৰুকৰণেৰে নিজৰ পক্ষত নিয়াৰ আপ্ৰাণ চেষ্টা চলাইছে। এইক্ষেত্ৰত বিজেপিৰ একমাত্ৰ লক্ষ্য হৈছে কংগ্ৰেছৰ গণতান্ত্ৰিক কাৰ্যসূচীসমূহত বাধা দিয়া আৰু ইয়াক ৰাষ্ট্ৰ বিৰোধী-হিন্দু বিৰোধী হিচাপে প্ৰতিষ্ঠা কৰি জনসাধাৰণক বিভ্ৰান্ত কৰা।
সেয়েহে, বিজেপিৰ ফান্দত ভৰি নিদি কংগ্ৰেছ তথা বিৰোধীয়ে কেনেকৈ বিজেপিৰ ধৰ্মীয় মেৰুকৰণৰ ৰাজনীতিক প্ৰতিহত কৰিব পাৰে আৰু গণতন্ত্ৰ তথা সংবিধান ৰক্ষাৰ যাত্ৰাক জনসাধাৰণৰ মাজলৈ লৈ যাব পাৰে সেইটোতে দৃষ্টি কেন্দ্ৰীভুত কৰা উচিত।