“নিৰ্বাচনৰ এবছৰ পূৰ্বৰ পৰা জনকল্যাণমূলক আঁচনি ৰূপায়ণ কৰাৰ উপৰি অভাৱগ্ৰস্ত মানুহক এটকীয়া চাউল, আটা, ম’বাইল ফোন তুলি দি বিজেপিয়ে ৰাইজৰ সমৰ্থন আদায় কৰিলে। এইবোৰ কিমান দিন থাকে ক’ব নোৱাৰো, কাৰণ বিজেপি চৰকাৰৰ হাতত পইচা নাই। ধনখিনি কৰ্প’ৰেটগোষ্ঠীৰ হাতত দি দিলে ক’ৰ পৰা থাকিব?” লোকসভা নিৰ্বাচনত বিজেপিৰ চমকপ্ৰদ সফলতাৰ পিছত সংবাদমেলত এই মন্তব্য কৰিছে বিশিষ্ট বুদ্ধিজীৱী ড০ হীৰেন গোহাঁয়ে।
নাগৰিকত্ব আইন সংশোধন বিৰোধী মঞ্চই আজি গুৱাহাটী প্ৰেছ ক্লাবত এখন সংবাদমেল সম্বোধন কৰে। তাতে ড০ গোহাঁয়ে এইদৰে কয়।
সংবাদমেলত ড০ গোহাঁয়ে কয়, “নিৰ্বাচনৰ ফল ঘোষণা হোৱাৰ পাছতেই ঘোষণা কৰা হ’ল এই বছৰ বৃহৎ কৰ্প’ৰেট গোষ্ঠীক ৫ শতাংশ কৰ ৰেহাই দিয়াৰ কথা। পৃথিৱীৰ সকলো দেশতে থকা জনকল্যাণমূলক যিবোৰ আঁচনি আছে, তাৰ খৰচ আহে অতি বৃহৎ ধনীসকলৰ পৰা, যিসকলে হয়তো দেশৰ ৬০-৭০ শতাংশ সম্পদ অধিকাৰ কৰি থাকে। তেওঁলোকৰ যি উপাৰ্জন হয়, তেওঁলোকৰে সম্পত্তি আৰু উপাৰ্জন বৃদ্ধি হয়। সাধাৰণ মানুহৰ উন্নতি নহয়”।
ইয়াৰোপৰি, দেশৰ বিভিন্ন শিতানত বৃহৎ কৰ্প’ৰেট গোষ্ঠীক ২৩ লাখ কোটি টকাৰ কৰ ৰেহাই দিয়া হৈছে বুলিও সংবাদমেলত সদৰী কৰে গোহাঁয়ে।
“এই ধনেৰে ভাৰতৰ দুখীয়া মানুহক বহুত সহায় কৰিব পাৰিলেহেঁতেন। সাধাৰণ মানুহৰ মূৰত মুল্যবৃদ্ধিৰ বোজা জাপি দি এনেদৰে কৰ ৰেহাই দিয়াৰ অৰ্থটো কি?” ড০ গোহাঁইৰ প্ৰশ্ন।
তাৎপৰ্য্যপূৰ্ণভাৱে, প্ৰচাৰৰ নামত বিজেপিয়ে হাজাৰ হাজাৰ কোটি টকা খৰচ কৰিছে বুলিও মন্তব্য কৰে গোহাঁয়ে।
ড০ গোহাঁইৰ মতে বিজেপিৰ নিৰ্বাচনী বিজয়ত প্ৰচাৰৰ এক ডাঙৰ ভূমিকা আছে। অতি পৰিকল্পিত কৌশল কৰি বিজেপি সফল হৈছে।
আনহাতে, যোৱাবছৰ দেশৰ তিনিখন ৰাজ্য ক্ৰমে মধ্য প্ৰদেশ, ছত্তিচগড় আৰু ৰাজস্থানত বিজেপি বিৰোধী জনমতৰ সৃষ্টি হোৱা বাবেই কংগ্ৰেছে চৰকাৰ গঠন কৰিবলৈ সক্ষম হোৱা বুলিও মন্তব্য কৰে গোহাঁয়ে।
“এবছৰ মান আগতে কংগ্ৰেছে দেশৰ তিনিখন ৰাজ্যৰ নিৰ্বাচনত জয়ী হৈছিল। বিজেপি বিৰোধী এটা মতৰ সৃষ্টি কৰিছিল আৰু তিনিও ৰাজ্যতে কংগ্ৰেছে চৰকাৰ গঠন কৰিছিল। এই কথাটো এনেই হোৱা নাছিল। বিজেপিৰ কাম-কাজৰ ওপৰতে সেইটো মতদান আছিল”, ড০ গোহাঁয়ে কয়।
আনহাতে, উক্ত সংবাদমেলতে উপস্থিত থকা প্ৰাক্তন প্ৰশাসনিক বিষয়া হৰেকৃষ্ণ ডেকাই কয় যে লোকসভা নিৰ্বাচনত নৰেন্দ্ৰ মোদীৰ ঢৌৱে সকলো বিৰোধীক উটুৱাই লৈ গৈছে আৰু তেওঁলোক দেখাত অ-প্ৰাসংগিক হৈ পৰিছে।
“নৰেন্দ্ৰ মোদীয়ে নিজকে এক শক্তিশালী নেতা হিচাপে প্ৰক্ষেপ কৰিবলৈ যি কৌশল লৈছিল তাত তেওঁ সফল হৈছে।” এইদৰে মন্তব্য কৰি তেওঁ লগতে কয়, “আনহাতে, বিৰোধীয়ে যি প্ৰাসংগিক প্ৰশ্ন উত্থাপন কৰিলে সেইবোৰৰ প্ৰভাৱ ভোটাৰ ৰাইজৰ ওপৰত নিৰ্বাচন জিকিব পৰাকৈ নপৰিল। কিন্তু সুস্থ গণতন্ত্ৰৰ বাবে এই প্ৰশ্নবোৰ ভৱিষ্যতেও উত্থাপন হৈ থাকিব লাগিব।”
তেওঁ আৰু কয়, “পুলৱামা আক্ৰমণৰ পাছতে বালাকোটত গৈ কৰা আক্ৰমণে ভাৰতীয় হিন্দু জাতীয়তাবাদী ভাৱধাৰা শতগুণে বঢ়াই দিছিল”।
ইপিনে, নাগৰিকত্ব সংশোধনী বিধেয়কৰ বিৰুদ্ধে তেওঁলোকৰ পূৰ্বৰ স্থিতি বাহাল থাকিব বুলি মন্তব্য কৰি তেওঁ কয়, “১৯৭১ চনৰ ২৫ মাৰ্চৰ পাছত অহা যিকোনো হিন্দু বা মুছলমান প্ৰব্ৰজনকাৰীসকলে খিলঞ্জীয়া মানুহৰ অস্তিত্বৰ প্ৰতি ভাৱুকি কঢ়িয়াই আনিছে। তেওঁলোকক নাগৰিকত্ব দিয়াৰ প্ৰসংগ ভৱিষ্যতেও বিৰোধিতা কৰি যাম।”
আনহাতে, মঞ্চৰ আহ্বায়ক মনজিৎ মহন্তই কয় যে দেশৰ জনসাধাৰণক নানান কূট-কৌশলেৰে সন্মোহিত কৰি কিছুমান আঁচনি ৰূপায়ণেৰে ক্ষমতা দখল কৰিলে যদিও তেওঁলোকৰ জনগণ বিৰোধী কামৰ ওপৰত ৰাইজে নজৰ দিব লাগিব আৰু নাগৰিকত্ব সংশোধনী বিধেয়ক গৃহীত কৰাৰ সকলো কৌশল ব্যৰ্থ কৰিবলৈ নাগৰিকত্ব আইন সংশোধন বিৰোধী মঞ্চ সাজু থাকিব।
