বাংকুৰা সমষ্টিৰ বিজেপিৰ সাংসদ তথা কেন্দ্ৰীয় শিক্ষা ৰাজ্যিক মন্ত্ৰী সুভাষ চৰকাৰৰ বিৰুদ্ধে বিক্ষোভ প্ৰদৰ্শন কৰিছে খোদ বিজেপিৰ কৰ্মকৰ্তাসকলে।
শনিবাৰে বাংকুৰাৰ শালতোৰাৰ লাধ ছেক্সনত টায়াৰ জ্বলাই কেন্দ্ৰীয় ৰাজ্যিক মন্ত্ৰীৰ বিৰুদ্ধে বিজেপি কৰ্মী-সমৰ্থক সকলে প্ৰতিবাদ সাব্যস্ত কৰে।
একে সময়তে বাংকুৰা বিজেপিৰ জিলা সভাপতি সুনীল ৰুদ্ৰ মণ্ডলৰ বিৰুদ্ধেও প্ৰতিবাদ সাব্যস্ত কৰে দলীয় কৰ্মীসকলে।
এইদৰে প্ৰতিবাদ সাব্যস্ত কৰি কৰ্মীসকলে নৱনিযুক্ত মণ্ডল সভাপতিক গ্ৰহণ কৰা নহ’ব বুলিও সকীয়াই দিয়ে।
ইয়াৰ পূৰ্বে কেন্দ্ৰীয় ৰাজ্যিক মন্ত্ৰীগৰাকীক বাংকুৰাৰ বিজেপিৰ জিলা কাৰ্যালয়ত দুঘণ্টা ধৰি আৱদ্ধ কৰি ৰাখিছিল দলীয় কৰ্মকৰ্তাসকলে। আৰক্ষী আহি তলা ভাঙিহে উদ্ধাৰ কৰি উলিয়াই আনিছিল সাংসদগৰাকীক।
বিজেপিৰ দলীয় সংঘাতৰ বাবেই জিলাখনত এনেদৰে দলৰ বিৰুদ্ধে ইটোৰ পিছতকৈ প্ৰতিবাদ সাব্যস্ত কৰিছে তৃৰ্ণমূল পৰ্যায়ৰ কৰ্মচাৰীসকলে। লোকসভা নিৰ্বাচন যিমানেই ওচৰ চাপি আহিছে সিমানেই আন্তঃকন্দল বৃদ্ধি পাইছে বিজেপিৰ ভিতৰ চ’ৰাত।
পুৰণি বিজেপি কৰ্মীক দলত আগস্থান নিদিয়াৰ অভিযোগত ক্ষোভিত হৈ পৰিছে দলীয় কৰ্মীসকল। নিম্ন পৰ্যায়ৰ কৰ্মীক অৱগত নকৰাকৈয়ে মণ্ডল সভাপতি নিযুক্তি দিয়াক লৈ তীব্ৰ অসন্তুষ্টি প্ৰকাশ কৰিছে সমষ্টিটোৰ দলীয় সদস্য সকলে।
স্থানীয় বিজেপি কৰ্মীসকলে দাবী কৰে যে কেন্দ্ৰীয় ৰাজ্যিক মন্ত্ৰী সুভাষ চৰকাৰে বিপদত তেওঁলোকৰ কাষত থিয় দিয়া নাছিল। পঞ্চায়ত নিৰ্বাচনৰ সময়ত তৃণমূলে তেওঁলোকক আক্ৰমণ কৰাৰ পিছতো জিলা বিজেপিৰ সভাপতি বা কেন্দ্ৰীয় ৰাজ্যিক মন্ত্ৰীৰ কোনো এজনো তেওঁলোকক লগ কৰিবলৈ অহা নাছিল।
এনে পৰিপ্ৰেক্ষিতত বাংকুৰা জিলা বিজেপি কিষাণ মৰ্চা সভাৰ সভাপতি ৰাহুল গংগোপাধ্যায়ে কয়, “পঞ্চায়ত নিৰ্বাচনত মোক তৃণমূলৰ দুষ্কৃতিকাৰীয়ে আক্ৰমণ কৰিছিল, মোৰ গাড়ী ভাঙি পেলোৱা হৈছিল। কিন্তু সেই সময়ৰ পৰা আজিলৈকে বাংকুৰা জিলাৰ নেতৃত্ব বা মন্ত্ৰীয়ে মোৰ কোনো খবৰ লোৱা নাছিল।”
এই সন্দৰ্ভত এটা ব্যক্তিগত টেলিভিছন চেনেলৰ আগত ৰাজ্যিক বিজেপি নেতা ৰাহুল সিনহাই কয়, ‘‘বাংকুৰাৰ শালতোৰাত যিটো ঘটনা সংঘটিত হৈছিল সেয়া অতি দুৰ্ভাগ্যজনক বুলি মই ভাবো। মই ভাবো দলৰ নেতৃত্বই বিষয়টো চাব। বিজেপি কৰ্মীৰ ক্ষোভ কমাবলৈ প্ৰয়োজনীয় ব্যৱস্থা গ্ৰহণ কৰা হ’ব বুলি মই ভাবো।”
