বগীবিল দলং সম্পূৰ্ণ হোৱাৰ পাছৰে পৰা দলংখনৰ নামকৰণকলৈ ব্যাপক চৰ্চা চলি আহিছিল। বিভিন্ন দল সংগঠনে দলংখনৰ নামকৰণকলৈ প্ৰস্তাৱ আগবঢ়াইছিল যদিও চৰকাৰে এইক্ষেত্ৰত সিদ্ধান্ত লোৱাৰ বাবে বিপাঙত পৰিছিল।
অসমৰ জনসাধাৰণৰ স্বাভিমানক সন্মান জনাই এখন দলঙৰ নামকৰণ কৰাটো অৱশ্যেই প্ৰয়োজনীয় যদিও সকলোৰে সহমত আদায় কৰাটো অত্যন্ত জটিল কাম। ধল-শদিয়া দলঙৰ নাম ড০ ভূপেন হাজৰিকা সেতু হিচাপে নামকৰণ কৰাৰ বাবে অসমৰ সৰ্বস্তৰৰ জনসাধাৰণে চৰকাৰক ধন্যবাদ জনাইছিল।
আনহাতে, দেশৰ ভিতৰতে ৰে’লপথ আৰু স্থলপথ দ্বৈত সেৱাৰ সুবিধা থকা আটাইতকৈ দীৰ্ঘতম দলং হিচাপে বগীবিলৰ নামকৰণকলৈয়ো সেয়ে সকলোৱে উৎসাহেৰে অপেক্ষা কৰি আছে।
জানিব পৰা মতে, বগীবিল দলঙৰ নাম বীৰাংগনা সতী সাধনী সেঁতু নামেৰে নামকৰণ কৰাৰ আহ্বান জনাই ৰাজ্যৰ পৰিবহণ বিভাগে ৰে’ল বিভাগলৈ পত্ৰ প্ৰেৰণ কৰিছে। পৰিবহণ বিভাগৰ উপ সচিব ৰাহুল চন্দ্ৰ দাসে উত্তৰ-পূব ৰে’লৱেৰ মহাপ্ৰৱন্ধকলৈ এই পত্ৰ প্ৰেৰণ কৰিছে।
পূৰ্বতে ৰে’ল বিভাগৰ সৈতে ৰাজ্যৰ পৰিবহণ বিভাগৰ বৈঠকত দলংখনৰ নাম বীৰাংগনা সাধনী দলং নামেৰে নামকৰণৰ সিদ্ধান্ত লোৱা হৈছিল। এতিয়া পৰিবহণ বিভাগে দলংখনৰ নাম বীৰাংগনা সাধনী দলঙৰ ঠাইত বীৰাংগনা সতী সাধনী সেঁতু হিচাপে ৰখাৰ বাবে পত্ৰ প্ৰেৰণ কৰিছে।
উল্লেখযোগ্য যে অসমৰ ভূমিপুত্ৰ চুতীয়াসকলৰ মহীয়সী বীৰাংগনা সাধনীৰ নামেৰে ব্ৰহ্মপুত্ৰৰ ওপৰত বগীবিলত নিৰ্মাণ কৰা চতুৰ্থখন দলঙৰ নাম ‘বীৰাংগনা সাধনী সেঁতু’ নামেৰে নামাকৰণ কৰাৰ দাবী জনাই আহিছিল।
এতিয়া অহা ২৫ ডিচেম্বৰত প্ৰধানমন্ত্ৰী নৰেন্দ্ৰ মোদীয়ে উদ্বোধন কৰিবলগীয়া বগীবিলৰ দলংখনৰ নাম বীৰাংগনা সতী সাধনী সেঁতু হোৱাৰ সম্ভাৱনা প্ৰায় স্পষ্ট হৈ পৰিছে।
