দ্বিতীয় পৰ্যায়ৰ পঞ্চায়ত নিৰ্বাচনৰ দিন চমু চাপি অহাৰ লগে লগে গোৱালপাৰা জিলাত নিৰ্বাচনী বতাহ ক্ৰমাৎ গৰম হৈ আহিছে। জিলাখনৰ মুঠ ১৬খন জিলা পৰিষদৰ অন্যতম ০৮/০৪ নং কৃষ্ণাই জিলা পৰিষদৰ সদস্যৰ আসনখন দখলৰ যুঁজত এইবেলি মুঠ চাৰিগৰাকী প্ৰাৰ্থীয়ে প্ৰতিদ্বন্দ্বিতা আগবঢ়াইছে।
কৃষ্ণাই জিলা পৰিষদৰ পৰা প্ৰতিদ্বন্দ্বিতা আগবঢ়োৱা প্ৰাৰ্থী কেইগৰাকী হ’ল বিজেপিৰ অৰুণা দাস বসু, অগপৰ ছাজমিনা চুলতানা, কংগ্ৰেছৰ ববিতা বেগম আৰু বি পি এফৰ মিন্ঠুলিনা এম সাংমা বসুমতাৰী। ছটা গাঁও পঞ্চায়তৰে গঠিত কৃষ্ণাই জিলা পৰিষদৰ আসনখন দখল কৰিবলৈ ইতিমধ্যে প্ৰতিযগৰাকী প্ৰাৰ্থী এতিয়া ব্যস্ত ৰণ কৌশল ৰচনা কৰাত।
প্ৰতিগৰাকী প্ৰাৰ্থীয়ে চহৰৰ লগতে গাঁৱে-ভূঞে মুকলি কৰিছে প্ৰচাৰ কাৰ্যালয়। প্ৰায় ৫৫ হেজাৰ ভোটাৰ থকা কৃষ্ণাই জিলা পৰিষদৰ সদস্যৰ আসনখনত অগপ আৰু বিজেপিয়ে তুলনামূলক ভাৱে দুৰ্বল প্ৰাৰ্থী প্ৰক্ষেপ কৰাত মূল প্ৰতিদ্বন্দ্বিতা কংগ্ৰেছ আৰু বি পি এফৰ মাজতে সীমাবদ্ধ থকাৰ সম্ভাৱনা প্ৰকট হৈ উঠিছে।
উল্লেখ্য যে কংগ্ৰেছ আৰু বিজেপিৰ ভিতৰ চ’ৰাত প্ৰাৰ্থিত্বকেন্দ্ৰিক সংঘাতে গা কৰি উঠাত বিসম্বাদী শিবিৰে বিকল্প হিচাপে বি পি এফৰ প্ৰাৰ্থী গৰাকীৰ প্ৰতি আকৰ্ষিত হোৱাৰ লগতে ভোটাৰ ৰাইজেও সমৰ্থন কৰিব বুলি চৰ্চিত হৈ আছে।
আনহাতে, ৰাভা হাছং যৌথ মঞ্চই বিজেপিৰ প্ৰাৰ্থীগৰাকীৰ প্ৰতি সমৰ্থন আগবঢ়োৱাত কৃষ্ণাইৰ নিৰ্বাচনী যুঁজখন যথেষ্ট উপভোগ্য হৈ উঠাৰ সম্ভাৱনা প্ৰবল। ইতিমধ্যে বিজেপিৰ প্ৰাৰ্থীগৰাকীয়েও তীব্ৰতৰ কৰি তুলিছে নিজৰ প্ৰচাৰ অভিযান।
