অসম-মেঘালয় সীমান্তত অৱস্থিত বৰ্নিহাট চহৰ ২০২৫ চনৰ প্ৰথমাৰ্ধত ভাৰতৰ সৰ্বাধিক প্ৰদূষিত চহৰ হিচাপে পৰিগণিত হৈছে। স্বতন্ত্ৰ গৱেষণা সংস্থা চেণ্টাৰ ফৰ ৰিচাৰ্চ অন এনাৰ্জি এণ্ড ক্লিন এয়াৰ (CREA)-ৰ এক সমীক্ষা অনুসৰি, জানুৱাৰীৰ পৰা জুন মাহৰ ভিতৰত বৰ্নিহাটত পি এম ২.৫ৰ গড় ঘনত্ব প্ৰতি ঘনমিটাৰত ১৩৩ মাইক্ৰ’গ্ৰাম হোৱাৰ বিপৰীতে দিল্লীত এই মাত্ৰা ৮৭ মাইক্ৰ’গ্ৰাম হৈছে, যাৰ ফলত দিল্লী এই তালিকাত দ্বিতীয় স্থানত আছে।
এই সমীক্ষাত শীৰ্ষ দহখন প্ৰদূষিত চহৰৰ তালিকাত বিহাৰৰ চাৰিখন চহৰ ক্ৰমে হাজীপুৰ, পাটনা, সাছাৰাম আৰু ৰাজগীৰ; উত্তৰ প্ৰদেশৰ গাজিয়াবাদ; হাৰিয়ানাৰ গুৰুগ্ৰাম; আৰু ওড়িশাৰ তালচেৰ আৰু ৰৌৰকেলা অন্তৰ্ভুক্ত হৈছে। ইয়াৰ বিপৰীতে মিজোৰামৰ আইজল চহৰ একে সময়তে দেশৰ আটাইতকৈ পৰিষ্কাৰ চহৰ হিচাপে চিহ্নিত হৈছে।
CREA-ৰ প্ৰতিবেদন অনুসৰি, ২৯৩খন চহৰৰ ভিতৰত, য’ত কন্টিনিউয়াছ এম্বিয়েণ্ট এয়াৰ কোয়ালিটি মনিটৰিং চিষ্টেম (CAAQMS) স্থাপন কৰা হৈছে, ২৩৯খন চহৰত ৮০ শতাংশতকৈ অধিক দিনৰ বাবে অণুবীক্ষণিক কণিকাৰ (পি এম ২.৫) তথ্য পোৱা গৈছিল। এই তথ্যৰ ভিত্তিত বৰ্নিহাটৰ বায়ু প্ৰদূষণৰ মাত্ৰা অত্যন্ত উদ্বেগজনক বুলি প্ৰকাশ পাইছে।
প্ৰতিবেদনত উল্লেখ কৰা হৈছে যে দিল্লীত যান-বাহনৰ ওপৰত নিৰ্দিষ্ট নিয়ন্ত্ৰণ ব্যৱস্থা গ্ৰহণ কৰাৰ ফলত বায়ুৰ গুণাগুণ কিছু পৰিমাণে উন্নত হৈছে। কিন্তু, প্ৰদূষণৰ অন্যান্য উৎস যেনে শিল্প কাৰ্যকলাপ, নিৰ্মাণ কাম, আৰু জৈৱ ইন্ধনৰ দহনৰ প্ৰতি পৰ্যাপ্ত গুৰুত্ব দিয়া হোৱা নাই বুলি সমীক্ষাত সমালোচনা কৰা হৈছে।
বৰ্নিহাটৰ এই অৱস্থাই অসম চৰকাৰক এক গুৰুত্বপূৰ্ণ প্ৰত্যাহ্বানৰ মাজলৈ ঠেলি দিছে। এনে পৰিস্থিতিত অস্ম চৰ কাৰৰ বাবে পৰিৱেশ সুৰক্ষা আৰু জনস্বাস্থ্যৰ স্বাৰ্থত প্ৰদূষণ নিয়ন্ত্ৰণৰ বাবে তৎকালীন আৰু কাৰ্যকৰী ব্যৱস্থা গ্ৰহণৰ প্ৰয়োজনীয়তা অতি জৰুৰী হৈ পৰিছে।
