নাগৰিকত্ব সংশোধনী বিধেয়কৰ বিৰোধিতাত উত্তৰ-পূবৰ ছাত্ৰ সংগঠনবোৰৰ উমৈহতীয়া মঞ্চ নেছ’, আছুকে ধৰি বিভিন্ন সংগঠনে ১০ ডিচেম্বৰত আহ্বান জনোৱা উত্তৰ-পূব বন্ধ কাৰ্য্যসূচীলৈ নৈতিক সমৰ্থন আগ বঢ়াইছে অসম সাহিত্য সভাই।
প্ৰধান সম্পাদক পদুম ৰাজখোৱা স্বাক্ষৰিত এখন প্ৰছ বিজ্ঞপ্তিৰ জৰিয়তে সাহিত্য সভাই আজি এই কথা সদৰী কৰে।
বিজ্ঞপ্তিটোত কয়, ‘ ভাৰতৰ উত্তৰ-পূবৰ খিলঞ্জীয়াৰ আৱেগ-অনুভূতি আৰু প্ৰতিবাদক ন্যুনতমো সন্মান প্ৰদৰ্শন নকৰি খিলঞ্জীয়াৰ ভৱিষ্যত অন্ধকাৰাচ্ছন্ন কৰি বিজেপি নেতৃত্বাধীন কেন্দ্ৰীয় চৰকাৰে জাপি দিবলৈ চেষ্টা কৰা বিধেয়কৰ বিৰোধিতাত বিভিন্ন সংগঠনে ঘোষনা কৰা বন্ধ কাৰ্যসূচীলৈ অসম সাহিত্য সভাই নৈতিক সমৰ্থন আগবঢ়াইছে।‘
উল্লেখযোগ্য যে কাইলৈৰ বন্ধ কাৰ্যসূচীলৈ সদৌ অসম কৰ্মচাৰী পৰিষদেও সমৰ্থন আগবঢ়াইছে। ইয়াৰ পৰিপ্ৰেক্ষিতত উক্ত দিনটোৰ বাবে ৰাজ্যৰ বিভিন্ন চৰকাৰী কাৰ্য্যালয় আৰু বিভাগবোৰত কাম-কাজ স্তব্ধ হৈ পৰাৰ সম্ভাৱনাই দেখা দিছে।
নেছ’ই আহ্বান দিয়া বন্ধৰ কাৰ্য্যসূচী অনুসৰি কাইলৈ পুৱা ৫ৰ পৰা বিয়লি ৪ বজালৈকে মুঠ ১১ ঘণ্টাৰ বাবে অসমকে ধৰি উত্তৰ-পূবৰ আটাইকেইখন ৰাজ্যত বন্ধ পালন কৰা হ’ব।
