নিৱনুৱা সমস্যাই ভাৰাক্ৰান্ত কৰা বিশ্বত যদি কুকুৰক চাকৰি দিয়া হয় তেন্তে সেয়া নিঃসন্দেহে দৃষ্টি আকৰ্ষক খবৰেই হ’ব।
হয়, এইবাৰ এটা বাটৰ কুকুৰক সসন্মাণে চাকৰিত মকৰল কৰিছে এটা কোম্পানীয়ে।
কোম্পানীটো এলা-পেছা কোম্পানী নহয়।
হুণ্ডাইৰ দৰে বিশ্বৰ আগশাৰীৰ কোম্পানীটোৱে বাটত ঘূৰি ফুৰা কুকুৰ এটাক চাকৰি দিছে।
ঘটনাটো ব্ৰাজিলৰ। ব্ৰাজিলৰ এছপিৰিটো ছান্তো অঞ্চলত থকা হুণ্ডাই কোম্পানীৰ শ্ব’ ৰুমত চাকৰি দিয়া কুকুৰটোৰ নাম ৰখা হৈছে টিছকন প্ৰাইম।
টিছকনে সদায় কোম্পীনীটোৰ শ্ব’ ৰুমৰ বাহিৰত ৰৈ থাকে।
শ্ব’ ৰুমৰ বাহিৰত বহি থাকিয়েই কুকুৰটো শ্ব’ৰুমৰ কৰ্মচাৰী সকলৰ আপোন হৈ পৰিছিল।
শ্ব’ ৰুমটোৰ আদৱ-কায়দাৰ সৈতেও কুকুৰটো পৰিচিত হৈ পৰিছিল।
সেয়ে কৰ্তৃপক্ষই সিদ্ধান্ত ল’লে যে কুকুৰটোক এটা চাকৰি দিয়া হ’ব।
ভৱা মতেই কাম। টিছকন প্ৰাইম নামৰ কুকুৰটোক দিয়া হ’ল শ্ব’ ৰুমৰ ৰিচেপচনিষ্টৰ চাকৰি।
এতিয়া গ্ৰাহক আহিলেই কুকুৰটোৱে নিজস্ব ধৰণে গ্ৰাহকক আদৰণি জনায়।
কুকুৰটোৰ ডিঙিত আঁৰি দিয়া হৈছে শ্ব’ ৰুমৰ পৰিচয় পত্ৰ।
কুকুৰটো থাকিবলৈ সাজি দিয়া হৈছে এটা কাঠৰ বিশেষ বাকচ।
কুকুৰটোৰ নামত শ্ব’ ৰুম কৰ্তৃপক্ষই খুলি দিছে এটা ইনষ্টাগ্ৰাম একাউণ্টো। এই একাউণ্টত কুকুৰটোৰ ফল’ৱাৰৰ সংখ্যা হৈছে প্ৰায় ২৫ হাজাৰ।কুকুৰটোক এনে সন্মাণ প্ৰদর্শন কৰাত উৎফুল্লিত হৈ পৰিছে পশুপ্ৰেমী সকল।
