আন এখন গ্ৰেণ্ড শ্লেমৰ ফাইনেল। আকৌ এবাৰ জানিক ছিনাৰ আৰু কাৰ্লোছ আলকাৰাজৰ সন্মুখ সমৰ। এই ছবিখন এতিয়া ক্ৰীড়াপ্ৰেমীৰ বাবে চিনাকি হৈ পৰিছে। আনকি নোভাক জ’কভিচেও সেইটো সলনি কৰিব নোৱাৰিলে।
আৰু এটা কথা যিটো সলনি নহ’ল – কাৰ্লোছ আলকাৰাজৰ হাতত জানিক ছিনাৰৰ আত্মসমৰ্পন। এই ২২ বছৰীয়া স্পেনিছ টেনিছ তাৰকাগৰাকীয়ে ইউ এছ অ’পেনৰ ফাইনেলত শেষ হাঁহি মাৰিলে। চাৰি ছেটৰ যুঁজত ছিনাৰক পৰাস্ত কৰি আলকাৰাজে ইউ এছ অ’পেনৰ খিতাপ দখল কৰে।
ফাইনেলত তেওঁ ৬-২, ৩-৬, ৬-১, ৬-৪ ব্যৱধানত জয়লাভ কৰে। ইয়াৰ লগে লগে আলকাৰাজে দ্বিতীয়বাৰৰ বাবে ইউ এছ অ’পেন চেম্পিয়ন হয়। কেৱল সেয়াই নহয়, ছিনাৰক অতিক্ৰম কৰি পুনৰ বিশ্ব ৰেংকিঙৰ শীৰ্ষলৈ উন্নীত হয়।
দেওবাৰে আৰ্থাৰ এছ ষ্টেডিয়ামত অনুষ্ঠিত হোৱা মেগা মেচখনক লৈ উত্তেজিত হৈ পৰিছিল টেনিছ অনুৰাগীসকল। আমেৰিকাৰ ৰাষ্ট্ৰপতি ড’নাল্ড ট্ৰাম্প নিজেই আহিছিল মেচ চাবলৈ। গতিকে মেচখন অলপ দেৰিকৈ আৰম্ভ হ’ল৷ অৱশ্যে আলকাৰাজক আৰম্ভণিৰে পৰাই অপ্ৰতিৰোধ্য দেখা গৈছিলৰ। ৬-২ ব্যবধানত প্ৰথম ছেটত তেওঁ সহজেই জয়লাভ কৰে।
দ্বিতীয় ছেটতছিনাৰ ঘূৰি আহিল। ইটালীৰ তাৰকাগৰাকীয়ে ব্ৰেক পইণ্ট ৰক্ষা কৰি দ্বিতীয় ছেটত ৬-৩ ব্যৱধানত মেচখন দখল কৰে। আৰু বৰ্তমানৰ ইউ এছ অ’পেনত আলকাৰাজৰ এইটোৱেই আছিল প্ৰথম কোনো ছেটত পৰাজয়।
কিন্তু আলকাৰাজে ছিনাৰক তৃতীয় ছেটত তিষ্ঠিবই নিদিলে। এটা সময়ত আলকাৰাজে ৫-০ ব্যৱধানত আগবাঢ়ি আছিল। ছিনাৰে এটা গেমত জয়ী হৈ মেচলৈ ঘূৰি আহিবলৈ চেষ্টা কৰিছিল। কিন্তু আলকাৰাজে দুৰ্দান্ত চাৰ্ভেৰে সেই আশাত চেঁচা পানী ঢালিলে। তৃতীয় ছেটত ৬-১ ব্যৱধানত জয়লাভ কৰে।
চতুৰ্থ ছেটতো ছিনাৰে যুঁজ দিয়ে। আলকাৰাজৰ পৰা দুটা শক্তিশালী ভলী চম্ভালি আৰু পিছুৱাই গ’লেও তেওঁ যুঁজ দিছিল। কিন্তু শেষ চাপত তেওঁ ভাঙি পৰিল। পঞ্চমটো গেমত আলকাৰাজে এটা গুৰুত্বপূৰ্ণ ব্ৰেক পইণ্ট লাভ কৰে আৰু তৃতীয়টো মেচ পইণ্টেৰে চেম্পিয়নৰ খিতাপ দখল কৰে।
