কিতাপ এখনৰ পৃষ্ঠা ধৰি মুখস্থ কৰাৰ দিন শেষ! অহা শিক্ষাবৰ্ষৰ পৰা নৱম শ্ৰেণীত অপেন বুক এছেছমেন্ট (OBAS) ত অনুমোদন জনাইছে চিবিএছইয়ে। এই বিশেষ মূল্যায়ন পদ্ধতি ২০২৬-২৭ শিক্ষাবৰ্ষত প্ৰৱৰ্তন কৰা হ’ব।
এই সন্দৰ্ভত ২৫ জুনত ব’ৰ্ডৰ গভৰ্ণিং বডিয়ে চূড়ান্ত সিদ্ধান্ত গ্ৰহণ কৰে। এই সিদ্ধান্ত ৰাষ্ট্ৰীয় শিক্ষা নীতি-২০২০ আৰু বিদ্যালয় শিক্ষাৰ ৰাষ্ট্ৰীয় পাঠ্যক্ৰম কাঠামো-২০২৩ (এনচিএফএছই)ৰ সৈতে মিল থকা বুলি কোৱা হৈছে।
এই সিদ্ধান্ত অনুসৰি নৱম শ্ৰেণীৰ পৰা ভাষা, গণিত, বিজ্ঞান আৰু সমাজ বিজ্ঞান আদি বিষয়ত মূলতঃ অপেন বুক পদ্ধতিৰে পৰীক্ষা অনুষ্ঠিত হ’ব। অৱশ্যে বিদ্যালয়সমূহৰ ওপৰত বাধ্যতামূলকভাৱ OBAS জাপি দিয়া নহ’ব। তেওঁলোকে ইচ্ছা কৰিলে এই পদ্ধতি অনুসৰণ নকৰিবও পাৰে।
এনচিএফএছইৰ মতে, অপেন বুক ব্যৱস্থাৰ মূল উদ্দেশ্য হৈছে কেৱল মুখস্থ কৰা নহয়, প্ৰশ্নৰ শুদ্ধ উত্তৰ প্ৰয়োগ কৰা। যাতে ছাত্ৰ-ছাত্ৰীসকলৰ বিশ্লেষণাত্মক দক্ষতা পৰীক্ষা কৰিব পৰা যায়।
অৱশ্যে চিবিএছইৰ বাবে অ’বিএএছ নতুন ব্যৱস্থা নহয়। ২০১৪-১৫ আৰু ২০১৬-১৭ চনত নৱম আৰু একাদশ শ্ৰেণীৰ কিছুমান বিষয়ত অপেন টেক্সট্ বেছ্ড এছেছমেন্ট প্ৰৱৰ্তন কৰা হৈছিল। কিন্তু ২০১৭-১৮ শিক্ষাবৰ্ষত এই ব্যৱস্থা বন্ধ কৰি দিয়া হয়।
