সমগ্ৰ ৰাজ্যৰ অন্তৰাত্মা কঁপাই যোৱা ডকমকা কাণ্ডৰ তদন্ত প্ৰক্ৰিয়াৰ অন্তত আজি চাৰ্জ ছীট দাখিল কৰিলে তদন্তকাৰী আৰক্ষীয়ে। মুখ্য ন্যায়িক দণ্ডাধীশৰ আদালতত দাখিল কৰা এই চাৰ্জ ছীটত মুঠ ৪৮জনক অভিযুক্ত কৰা হৈছে। হত্যাকাণ্ডত আক্ৰমণকাৰীয়ে ব্যৱহাৰ কৰা জাঠী-জোং আদিও আদালতত জমা দিয়া হৈছে বুলি জানিবলৈ দিয়ে। ৯০ দিনৰ সময়সীমাৰ ভিতৰতে এই চাৰ্জ ছীট দাখিল কৰা হৈছে। আজি দাখিল কৰা নথি-পত্ৰৰ সংখ্যা প্ৰায় ৯০০ পৃষ্ঠাৰ ওচৰা-উচৰি আৰু ইয়াৰ মাজতে ৪৮ পৃষ্ঠাৰ চাৰ্জ ছীট আছে।
তদন্তৰ প্ৰক্ৰিয়াত মুঠ ৭১জন লোকৰ সাক্ষ্য লোৱা হৈছিল বুলি সংবাদমেলত জানিবলৈ দিয়ে ৰাজ্যৰ আৰক্ষী সঞ্চালক প্ৰধান কুলধৰ শইকীয়াই।
উল্লেখযোগ্য যে যোৱা 8 জুনত সংঘটিত উক্ত নাৰকীয় কাণ্ডত শিশু অপহৰণকাৰী সজাই অভিজিত নাথ আৰু নীলোৎপল দাস নামৰ নিৰ্দোষী, প্ৰতিভাশালী দুজন যুৱকক হানি-খুঁচি হত্যা কৰিছিল এদল উন্মত্ত জনতাই।
এই কাণ্ডৰ ক্ষিপ্ৰ তদন্ত কৰিবলৈ অসম চৰকাৰে বিশেষ তদন্ত গোট (SIT) গঠন কৰি দিছিল। হত্যাকাৰীসকলৰ বিৰুদ্ধে বিভিন্ন ধাৰাত দুটা কেছ পঞ্জীয়ন কৰা হৈছিল। দুয়োটা গোচৰত মুঠ ৪৮জন লোকক এতিয়ালৈকে গ্ৰেপ্তাৰ কৰা হৈছে।
চাৰ্জছীট দাখিল কৰাৰ পিছত আজি এখন সংবাদমেল সম্বোধন কৰেৰাজ্যৰ আৰক্ষী সঞ্চালক প্ৰধান কুলধৰ শইকীয়াই। তেওঁ আৰক্ষীয়ে শক্তিশালী তথ্য-প্ৰমাণ আদালতত দাখিল কৰিছে বুলি দাবী কৰে।
