ক’ৰানা ভাইৰাছৰ সংক্ৰমণ প্ৰতিৰোধৰ বাবে জিলা প্ৰশাসনে গ্ৰহণ কৰা ব্যৱস্থাৱলী পৰ্যালোচনা কৰাৰ উদ্দেশ্যে মুখ্য মন্ত্ৰী সৰ্বানন্দ সোণোৱাল আজি হোজাই আৰু নগাঁও জিলা প্ৰশাসনে গ্ৰহণ কৰা পদক্ষেপ সমূহ পৰ্যালোচনা কৰে।
মুখ্য মন্ত্ৰী সোণোৱালে হোজাই জিলা উপায়ুক্তৰ কাৰ্য্যালয়ৰ সভাকক্ষত এক বৈঠকত মিলিত হয়। বৈঠকত জিলা উপায়ুক্ত গৰাকীয়ে ক’ৰ’না ভাইৰাছ সংক্ৰমণ প্ৰতিৰোধ কৰা বাবে লোৱা ব্যৱস্থাৱলীৰ লগতে ল’কডাউন কাৰ্য্যসূচী সফল ৰূপত পালন কৰাৰ বাবে জিলা প্ৰশাসনে গ্ৰহণ কৰা পদক্ষেপ সমূহৰ বিষয়ে সোণোৱালক অৱগত কৰে।
এই পৰ্যালোচনা বৈঠকত বিধায়ক শিলাদিত্য দেৱ, বিমল বৰা, উপায়ুক্ত, আৰক্ষী অধীক্ষক আৰু অন্যান্য বিভাগ সমূহৰ উচ্চ পদস্থ বিষয়াসকল উপস্থিত আছিল।
হোজাইৰ পাছতে সোণোৱালে নগাঁৱৰ ভোগেশ্বৰী ফুকননী অসামৰিক চিকিৎসালয়ত উপস্থিত হৈ স্বাস্থ্য বিভাগে গ্ৰহণ কৰা পদক্ষেপ সমূহ পৰ্যালোচনা কৰে। মুখ্য মন্ত্ৰীয়ে চিকিৎসালয়খনৰ আছুতীয়া কক্ষকে ধৰি বিভিন্ন ব্যৱস্থাৰাজি পৰিদৰ্শন কৰে।
চিকিৎসালয় পৰিদৰ্শনৰ অন্তত মুখ্য মন্ত্ৰী সোণোৱালে নগাঁও আৱৰ্ত ভৱনৰ সভা কক্ষত অনুষ্ঠিত এক বৈঠকত জিলা প্ৰশাসনে গ্ৰহণ কৰা পদক্ষেপ সমূহ পৰ্যালোচনা কৰে।
জিলাখনত জনসাধাৰণক অত্যাৱশ্যকীয় সামগ্ৰী যোগান ধৰাৰ বাবে মজুত থকা খাদ্যৰ পৰিমাণৰ বিষয়টোও পৰ্যালোচনা কৰে মুখ্য মন্ত্ৰী গৰাকীয়ে।
আনহাতে, ল’কডাউনৰ সময়ত সাংবাদিক সকলে কষ্ট স্বীকাৰ কৰি নিজৰ দায়িত্ব পালন কৰাৰ বিষয়েও মুখ্য মন্ত্ৰীয়ে উল্লেখ কৰে।
