শিশুক লৈ আৰম্ভ হৈছে অনলাইন যৌন ব্যৱসায়। তেলেংগানা আৰক্ষীয়ে গ্ৰেপ্তাৰ কৰিছে শিশুৰ অশ্লীল ভিডিঅ’ক লৈ ব্যৱসায় কৰা এটা বৃহৎ চক্ৰ।
ৰাজ্যখনৰ বিভিন্ন প্ৰান্তৰ পৰা ১৫ জন লোকক গ্ৰেপ্তাৰ কৰিছে ৰাজ্যিক চাইবাৰ ক্ৰাইম ব্যুৰোৱে। ইফালে গ্ৰেপ্তাৰ হোৱা লোকৰ তালিকা দেখি আৰক্ষীও আচৰিত হৈছে।
জানিব পৰা মতে, গ্ৰেপ্তাৰ হোৱা লোকসকলৰ ভিতৰত আছে আই আই টিৰ স্নাতক। আনকি ইঞ্জিনিয়াৰিঙৰ এজন ছাত্ৰও এই তালিকাত আছে।
ৰাজ্যিক চাইবাৰ ক্ৰাইম ব্যুৰোৰ সঞ্চালক শিখা গোৱেলে কয় যে কেইবাদিনো ধৰি এই বিষয়ত আৰক্ষীয়ে অভিযোগ লাভ কৰি আহিছে। অভিযোগৰ ভিত্তিত বুধবাৰে ৰাজ্যজুৰি এক অভিযান চলোৱা হয়।
তেলেংগানা চাইবাৰ ক্ৰাইম ব্যুৰোৱে জনোৱা মতে, ৰাজ্যখনৰ বিভিন্ন থানাত দাখিল কৰা একাধিক অভিযোগৰ ভিত্তিত এই বিশেষ অভিযান চলোৱা হৈছে। এই অভিযানত মুঠ ১৫ জন লোকক গ্ৰেপ্তাৰ কৰা হৈছে।
আৰক্ষীয়ে জনোৱা মতে, অধিকাংশ অভিযুক্তৰ বয়স প্ৰায় ২০ বছৰ। তদুপৰি সকলো শিক্ষিত। তেওঁলোকৰ লক্ষ্য আছিল মূলতঃ ৬ৰ পৰা ১৪ বছৰৰ ভিতৰৰ শিশু।
