ক’ৰ’না ভাইৰাছে অভূতপূৰ্ব আতংকৰ সৃষ্টি কৰা চীনে আক্ৰান্ত লোকসকলৰ বাবে ইয়াৰ য়ুহান মহানগৰখনত মাত্ৰ ৬টা দিনৰ ভিতৰতে এখন সুকীয়া চিকিৎসালয় নিৰ্মাণ কৰিবলৈ যুদ্ধকালীন গতিত কাম কৰি আছে।
এছ’চিয়েটেড প্ৰেছক য়ুহানৰ কৰ্তৃপক্ষই জানিবলৈ দিয়া মতে, ১ হাজাৰ বিছনা থাকিব লগীয়া চিকিৎসালয়খন অহা ৩ ফেব্ৰুৱাৰিত চিকিৎসা চলাব পৰা হৈ উঠিব।
বৰ্তমান এই ভাইৰাছত আক্ৰান্ত লোকসকলক মহানগৰখনৰ আন আন চিকিৎসালয়তে চিকিৎসা কৰি থকা হৈছে।
চিকিৎসালয়খনৰ অংশবোৰ সুকীয়া সুকীয়াকৈ নিৰ্মাণ কৰা হৈছে যাতে খুব সোনকালেই ইয়াক সম্পূৰ্ণ ৰূপ দিব পৰা যায়।
উপলব্ধ হোৱা ভিডিঅ’ ফুটেইজ কিছুমানত দেখা গৈছে যে বিভিন্ন নিৰ্মাণ যন্ত্ৰই নিৰ্মাণ স্থানত কাম কৰি আছে।
চীনে ২০০৩ চনতো মাৰাত্মক ৰূপ লোৱা SARS-ৰ সৈতে যুঁজ দিওঁতেও অনুৰূপ দ্ৰুত ব্যৱস্থা লৈছিল।
নতুন এই ভাইৰাছবিধৰ প্ৰাদুৰ্ভাব এই য়ুহান মহানগৰখনৰ পৰাই আৰম্ভ হোৱা বুলি ধাৰণা কৰা হৈছে।
বিজ্ঞান-প্ৰযুক্তিত উন্নত দেশখনে এই মাৰাত্মক ভাইৰাছবিধৰ সৈতে মোকাবিলা কৰিবলৈ বিভিন্ন অভূতপূৰ্ব পদক্ষেপ ল’ব লগীয়া হৈছে। ইয়াৰ ভিতৰত প্ৰায় ১৩খন মহানগৰ বন্ধ কৰি দিয়াৰ দৰে পদক্ষেপো আছে।
৬ দিনৰ ভিতৰত এখন চিকিৎসালয় নিৰ্মাণক People’s Daily-এ চিকিৎসা বিজ্ঞানৰ ইতিহাসত এটা “বিস্ময়কৰ ঘটনা” (miracle) আখ্যা দিছে।
