বিবাহিত দম্পতী অথবা প্ৰেমিক-প্ৰেমিকাৰ মাজত এতিয়াৰ পৰা আৰু দূৰত্ব কোনো বাধা হ’ব নোৱাৰে। দুয়ো পৃথক পৃথক স্থানত থাকিও অৰ্থাৎ দুয়োৰে মাজত দূৰত্বৰ ব্যৱধান থাকিলেও এতিয়াৰ পৰা কৰিব পাৰিব প্ৰেমভৰা চুম্বন। দম্পতী তথা প্ৰেমাস্পদসকললৈ এই বিশেষ সুবিধা আনি দিছে চীনৰ এখন বিশ্ববিদ্যালয়ে।
চীনৰ চাংঝৌ ভোকেচনেল ইনষ্টিটিউট অৱ মেকাট্ৰনিক টেকন’লজিয়ে উদ্ভাৱন কৰিছে এই চমকপ্ৰদ ‘কিচিং ডিভাইচ’। এই ন উদ্ভাৱনে এতিয়া সামাজিক মাধ্যমত তীব্ৰ খোৰাকৰ সৃষ্টি কৰিছে। চৰ্চিত এই কিচিং ডিভাইচে উৎসুকতা বৃদ্ধি কৰিছে নেটিজেনৰ।
দীৰ্ঘ দূৰত্বৰ ব্যৱধান থকা দম্পতীসমূহক প্ৰকৃত শাৰীৰিক ঘনিষ্ঠতা অনুভৱ কৰাৰ উপায় হিচাপে এই ডিভাইচটোৰ বিজ্ঞাপন দিয়া হৈছে। প্ৰকাশিত খবৰ অনুসৰি ছিলিকন ওঁঠৰ সৈতে এই অনন্য ‘কিচিং ডিভাইচ’টোত প্ৰেচাৰ চেন্সৰ আৰু এক্টিভেটৰ আছে।
এই ডিভাইচটোৰ দ্বাৰা ব্যৱহাৰকাৰীৰ ওঁঠৰ চাপ, গতি আৰু উষ্ণতাৰ অনুৰূপ অনুকৰণ কৰি প্ৰকৃত চুম্বনৰ দৰেই অনুভৱ কৰিব পৰা যায় বুলি দাবী কৰা হৈছে। চুম্বনৰ উপৰিও এই ডিভাইচটোৱে ব্যৱহাৰকাৰীয়ে কৰা শব্দও প্ৰেৰণ কৰিব পাৰে।
জানিব পৰা মতে, ডিভাইচটো ব্যৱহাৰ কৰিবলৈ ব্যৱহাৰকাৰীয়ে কেৱল এটা মোবাইল এপ ডাউনলোড কৰি ডিভাইচটো মোবাইলৰ চাৰ্জিং প’ৰ্টত প্লাগ কৰিব লাগিব। এপটোৰ জৰিয়তে আনগৰাকী ব্যক্তিৰ সৈতে ডিভাইচটো সংযোগ কৰাৰ পিছত তেওঁলোকে ভিডিঅ’ কল আৰম্ভ কৰিব পাৰে আৰু পৰস্পৰে পৰস্পৰক চুম্বন যাচিব পাৰে।
এই ডিভাইচটোৰ উদ্ভাৱক জিয়াং ঝংলিয়ে ডিভাইচটোৰ উদ্ভাৱনৰ আঁৰৰ কাহিনীও সংবাদ মাধ্যমৰ আগত ব্যক্ত কৰিছে। তেওঁ কয়, “মোৰ বিশ্ববিদ্যালয়ত মোৰ প্ৰেমিকাৰ সৈতে দীৰ্ঘ দূৰত্বৰ সম্পৰ্ক আছিল। গতিকে আমাৰ মাজত কেৱল ফোনযোগেহে যোগাযোগ আছিল। ইয়াৰ পৰাই এই ডিভাইচৰ ধাৰণা মনলৈ আহিছিল।”
প্ৰকাশিত খবৰ অনুসৰি, জিয়াঙে ২০১৯ চনত ডিভাইচটোৰ পেটেণ্টৰ বাবে আবেদন কৰিছিল যদিও ২০২৩ চনৰ জানুৱাৰী মাহত পেটেণ্টৰ অন্ত পৰে। তেওঁ এতিয়া এই ডিভাইচটোৰ প্ৰতি আগ্ৰহী কোনো লোকে ডিজাইনটোৰ নিখুঁতকৈ আৰু অধিক ক্ষমতাসম্পন্ন কৰিব পাৰিব বুলি আশা প্ৰকাশ কৰিছে।
ইফালে চীনৰ চ’ছিয়েল মিডিয়া ৱেইব’ত এই ডিভাইচটোৱে আলোড়নৰ সৃষ্টি কৰিছে। কিছু সংখ্যক লোকে ডিভাইচটোক ইতিবাচক ৰূপে গ্ৰহণ কৰিলেও আন একাংশই ইয়াক অশ্লীল বুলি সমালোচনা কৰে।
