বেংগালুৰুত ক্ৰিকেট অনুৰাগীৰ মৃত্যুৰ পিছতে কৰ্ণাটক চৰকাৰে এক বৃহৎ পদক্ষেপ গ্ৰহণ কৰিছে। ভৱিষ্যতে এনেধৰণৰ ঘটনা ৰোধ কৰিবলৈ চিন্নাস্বামী ষ্টেডিয়াম স্থানান্তৰিত কৰাৰ পৰিকল্পনা কৰিছে মুখ্যমন্ত্ৰী সিদ্ধাৰমাইয়াই।
তেওঁ কয়, চৰকাৰে দীৰ্ঘম্যাদী সমাধানৰ কথা ভাবিছে। গতিকে ষ্টেডিয়ামখন আন ঠাইলৈ স্থানান্তৰ কৰাৰ কথা পৰিকল্পনা কৰা হৈছে। কোনো চৰকাৰৰ অধীনত এনে অপ্ৰীতিকৰ ঘটনা সংঘটিত হ’ব নালাগে। তেওঁ লগতে কয় এই ঘটনাত ব্যক্তিগতভাৱে আঘাত পাইছে। ইতিমধ্যে পাঁচজন আৰক্ষী বিষয়াক কৰ্তব্যত গাফিলতিৰ বাবে চাকৰিৰ পৰা বৰ্খাস্ত কৰা হৈছে। আৰক্ষী অধীক্ষক আৰু তেওঁৰ ব্যক্তিগত সম্পাদককো বদলি কৰিব লাগে বুলি উল্লেখ কৰিছে।
এই সমগ্ৰ ঘটনাক লৈ বিজেপি আৰু জেডিএছে কৰ্ণাটকৰ মুখ্যমন্ত্ৰীক আক্ৰমণৰ লক্ষ্য কৰি লৈছে। কেন্দ্ৰীয় মন্ত্ৰী তথা বিজেপি নেত্ৰী শোভা কাৰণ্ডলাজে কয়, সিদ্দাৰমাইয়া আৰু উপ-মুখ্যমন্ত্ৰী ডি কে শিৱকুমাৰৰ হাতত তেজ আছে। তদুপৰি পদত্যাগৰ দাবী উত্থাপন কৰে। প্ৰত্যুত্তৰত কুম্ভমেলাত ইমান সংখ্যক লোকৰ মৃত্যু হোৱাৰ পিছত উত্তৰ প্ৰদেশৰ মুখ্যমন্ত্ৰীয়ে পদত্যাগ কৰিলে নেকি? তেওঁৰ পদত্যাগৰ দাবীৰ বিষয়ে বিজেপি আৰু জেডিএছে জানিছিল নেকি? বুলি প্ৰশ্ন কৰে। এই ঘটনা পৰিতাপৰ কথা।কিন্তু ইয়াৰ বআবে প্ৰশাসন দায়ী নহয়। ঘটনাৰ দোষীসকলৰ বিৰুদ্ধে আইনী ব্যৱস্থা গ্ৰহণ কৰা হৈছে। গতিকে চৰকাৰ লজ্জিত হোৱাৰ কোনো প্ৰশ্নই উত্থাপন নহয় বুলি মন্তব্য কৰে।
