ধুবুৰীৰ এগৰাকী সাংবাদিক ৰাজীব শৰ্মাক জিলা বন বিষয়া এগৰাকীৰ পত্নীক দুৰ্ব্যৱহাৰ কৰা তথা ধনদাবীৰ অভিযোগত আৰক্ষীয়ে গ্ৰেপ্তাৰ কৰাৰ ঘটনাৰ তদন্ত অপৰাধ অনুসন্ধান শাখা (চি আই ডি)ক দিয়াৰ কথা শুকুৰবাৰে অসম আৰক্ষীয়ে ঘোষণা কৰিছে।
ৰাজ্যখনৰ আইন শৃংখলা শাখাৰ অতিৰিক্ত আৰক্ষী সঞ্চালক প্ৰধান জি পি সিঙে এই কথা জানিবলৈ দিয়ে।
এটা নিউজ চেনেলৰ ধুবুৰীৰ সাংবাদিক ৰাজীব শৰ্মাক বৃহস্পতিবাৰে তেওঁৰ গৌৰীপুৰৰ বাসভৱনৰ পৰা নিশা ২ বজাত গ্ৰেপ্তাৰ কৰিছিল।
তেওঁক গ্ৰেপ্তাৰ কৰাৰ পাছতে তেওঁৰ ৬৪বছৰীয়া অসুস্থ পিতৃৰ হৃদৰোগত আক্ৰান্ত হৈ মৃত্যু ঘটিছিল।
‘’এটা বৈদ্যুতিন মাধ্যমৰ এগৰাকী স্থানীয় সাংবাদিকক গ্ৰেপ্তাৰ কৰাৰ ঘটনাৰ গোচৰটো সঠিক তদন্তৰ বাবে অপৰাধ অনুসন্ধান শাখালৈ বদলি কৰা হৈছে,’’-আইন শৃংখলা শাখাৰ অতিৰিক্ত আৰক্ষী সঞ্চালক প্ৰধান জি পি সিঙে শুকুৰবাৰে ধুবুৰীৰ সাংবাদিকসকলক জানিবলৈ দিয়ে।
আৰক্ষী বিষয়াগৰাকীয়ে শৰ্মাৰ বাসভৱনলৈ গৈ শোকসন্তপ্ত পৰিয়ালবৰ্গক সান্তনা জনায়। তেওঁ লগতে ধুবুৰী আৰক্ষী থানালৈও যায়।
শুকুৰবাৰে এখন স্থানীয় আদালতে শৰ্মাক তেওঁৰ পিতৃৰ শেষকৃত্য সম্পন্ন কৰাৰ বাবে অন্তৱৰ্তীকালীন জামিন মঞ্জুৰ কৰে।
অতিৰিক্ত আৰক্ষী সঞ্চালক প্ৰধানগৰাকীয়ে কয় যে ভিজিলেন্স এণ্ড এন্টি-ক’ৰাপশ্যন শাখাই ডিএফঅ’ৰ গোচৰটো সুকীয়াকৈ তদন্ত কৰিব আৰু ইয়াৰ সাংবাদিকগৰাকীৰ বিৰুদ্ধে থকা অপৰাধ গোচৰটোৰ সৈতে সম্পৰ্ক নাথাকিব।
তেওঁ লগতে কয় যে যোৱা দুবছৰত গৰুৰ চোৰাং ব্যৱসায়ত ধুবুৰী জিলা আৰক্ষীৰ ভূমিকা সম্পৰ্কে তদন্ত কৰিবলৈ এটা বিশেষ তদন্তকাৰী দল (এছ আই টি) গঠন কৰা হ’ব।
‘’মই আজি প্ৰাথমিক তদন্ত কৰিলো আৰু আজি নিশা মোৰ প্ৰতিবেদন ডিজিপি আৰু মুখ্য মন্ত্ৰীক দাখিল কৰিম,’’- অতিৰিক্ত আৰক্ষী সঞ্চালক প্ৰধানগৰাকীয়ে কয়।
শাসকীয় বিজেপি আৰু বিৰোধী কংগ্ৰেছেও শৰ্মাৰ গ্ৰেপ্তাৰৰ ঘটনাক গৰিহনা দিছে।
আনহাতে, সাংবাদিক গৰাকীৰ গ্ৰেপ্তাৰৰ ঘটনাই গোটেই ৰাজ্যতে তীব্ৰ প্ৰতিক্ৰিয়াৰ সৃষ্টি কৰাৰ পাছতে জিলাখনৰ আৰক্ষী অধীক্ষক আৰু ডিএফঅ’ গৰাকীক শুকুৰবাৰে বদলি কৰা হৈছে।
সাংবাদিক শৰ্মাক গ্ৰেপ্তাৰৰ আঁৰত আৰক্ষী অধীক্ষকগৰাকী জৰিত থকা বুলি বিভিন্নজনে কৰা অভিযোগৰ পাছতেই শুকুৰবাৰে মুখ্য মন্ত্ৰীৰ নিৰ্দেশত এই সিদ্ধান্ত গ্ৰহণ কৰা হয়।
আৰক্ষী অধীক্ষক যুৱৰাজ সিঙক বদলি কৰা হৈছে অসম আৰক্ষীৰ ১ নম্বৰ বেটেলিয়নৰ কমাণ্ডেণ্ট পদলৈ।
ইপিনে, ধুবুৰীৰ ডি এফ অ’ বিশ্বজিৎ ৰায়কো বশিষ্ঠলৈ বদলি কৰা হৈছে।
উল্লেখ্য যে গৰুৰ চোৰাং সৰবৰাহৰ বিৰুদ্ধে নিৰন্তৰে বাতৰি প্ৰচাৰ কৰি আহিছিল সাংবাদিক ৰাজীৱ শৰ্মাই।
ইয়াৰ পাছতে ধুবুৰীৰ ডি এফ অ’ বিশ্বজিৎ ৰায়ৰ এজাহাৰৰ ভিত্তিত সাংবাদিক শৰ্মাক আক্ৰোশমূলকভাৱে ১৫ জুলাইৰ পুৱতি নিশা গ্ৰেপ্তাৰ কৰিছিল ধুবুৰী আৰক্ষীয়ে।
ইতিমধ্যে বিষয়টোক লৈ ছ’চিয়েল মিডিয়াত ব্যাপক প্ৰতিক্ৰিয়াৰ সৃষ্টি হৈছিল। ৰাজ্যৰ বিভিন্ন জিলাৰ সাংবাদিক সন্থা সমূহে ৰাজীৱ শৰ্মাক মুক্তি দিয়াৰ বাবে চৰকাৰৰ ওচৰত দাবীও জনাইছে।
ইফালে IPS আনন্দ মিশ্ৰক ধুবুৰীৰ নতুন আৰক্ষী অধীক্ষক আৰু P.V Trimbak ক নতুন জিলা বন বিষয়া হিচাপে নিযুক্তি দিয়া হৈছে।
