নাগৰিকত্ব বিধেয়ক বাতিল নকৰিলে পৰিস্থিতি বিষময় হ’ব বুলি বিজেপিক সকীয়াই দিছে অসম সাহিত্য সভা আৰু খিলঞ্জীয়া জনজাতীয় সাহিত্য সভাই।
শনিবাৰে দীঘলীপুখুৰী পাৰৰ লক্ষীধৰ বৰা ক্ষেত্ৰত বিধেয়কৰ বিৰুদ্ধে কৰা ধৰ্মঘটথলীৰ পৰা বিজেপি চৰকাৰক এই বাৰ্তা প্ৰেৰণ কৰিছে সাহিত্য সভাই।
“প্ৰবল গণতান্ত্ৰিক আন্দোলনৰ মুখা-মুখি হ’ব লাগিব অসমবাসী। এই বিধেয়ক আইনত কোনো কাৰণতে পৰিণত কৰিব নোৱাৰিব। যদি কৰে, তেন্তে বিষময় পৰিস্থিতিৰ বাবে বিজেপি চৰকাৰ সাজু থাকিব লাগিব,” অসম সাহিত্য সভাৰ সভাপতি পৰমানন্দ ৰাজবংশীৰ হুংকাৰ।
ৰাজবংশীয়ে এই বাৰ্তাই চৰকাৰৰ প্ৰতি শেষ বাৰ্তা বুলিও মন্তব্য কৰে।
প্ৰতিবাদত অংশগ্ৰহণ কৰি খিলঞ্জীয়া জনজাতীয় সাহিত্য সভাৰ সম্পাদক প্ৰধান কমলাকান্ত মুছাহাৰীয়ে সৰ্বানন্দ সোণোৱালক দলৰ সিদ্ধান্তৰ বিপৰীতে গৈ সাহসী ভূমিকা লোৱাৰ বাবে আহ্বান জনায়।
পুৱা ১১ বজাৰ পৰা হোৱা প্ৰতিবাদী ধৰ্মঘটত আছু, কৃষক মুক্তি সংগ্ৰাম সমিতিৰ নেতা অখিল গগৈ, অগপ নেতা কেশৱ মহন্তকে ধৰি বিভিন্ন দল-সংগঠন আৰু ব্যক্তিও উপস্থিত থাকে।
