অযোধ্যা ৰায়দানৰ পিছতে আজি অসমলৈ আহিব দেশৰ মুখ্য ন্যয়াধীশ ৰঞ্জন গগৈ

বহু প্ৰত্যাশিত অযোধ্যা গোচৰৰ ৰায়দানৰ এদিন পিছতে আজি অসমলৈ আহিব দেশৰ মুখ্য ন্যায়াধীশ ৰঞ্জন গগৈ।

গুৱাহাটীৰ ITA মাছখোৱা প্ৰকল্পত এখন গ্ৰন্থ উন্মোচনী সভাত ভাগ লোৱাৰ উদ্দেশ্যে তেওঁ গুৱাহাটীলৈ আহিব।

ৰঞ্জন গগৈৰ সৈতে পৰৱৰ্তী মুখ্য ন্যায়াধীশ শাৰদ অৰৱিন্দ ববডেও গ্ৰন্থ উন্মোচনী সভাত উপস্থিত থাকিব। গগৈ দিল্লীৰ পৰা বাহিৰে বাহিৰে ডিব্ৰুগড়লৈ যাব আৰু তাৰ পিছত ডিব্ৰুগড়ৰ পৰা গুৱাহাটীলৈ আহিব বুলি জানিব পৰা গৈছে।

ITA মাছখোৱা প্ৰকল্পত আজি বিয়লি দুয়োগৰাকীয়ে উচ্চতম ন্যায়ালয়ৰ দ্বাৰা প্ৰকাশিত ‘Courts of India : Past to Present’ ৰ অসমীয়া অনুবাদ ‘ভাৰতবৰ্ষৰ আদালতসমূহ : অতিতৰ পৰা বৰ্তমানলৈ’খন উন্মোচন কৰিব।

উল্লেখযোগ্য যে, শনিবাৰে অযোধ্যা গোচৰক লৈ দিয়া ঐতিহাসিক ৰায়দানৰ পিছতে কেন্দ্ৰীয় চৰকাৰে মুখ্য ন্যায়াধীশ গগৈৰ নিৰাপত্তা ব্যৱস্থা জেদ প্লাছলৈ উন্নীত কৰে।

অহা ১৭ নৱেম্বৰত ৰঞ্জন গগৈয়ে দেশৰ মুখ্য ন্যায়াধীশৰ পদৰ পৰা অৱসৰ গ্ৰহণ কৰিব। অৱসৰৰ পিছত তেওঁ গুৱাহাটীতে বসবাস কৰাৰ পৰিকল্পনা কৰিছে।