হিমন্ত বিশ্ব শৰ্মা মুখ্যমন্ত্ৰী হোৱাৰ পাছতেই কঁপাল ফুলিল পত্নী ৰিণিকি ভূঞা শৰ্মাৰ মালিকীস্বত্ব থকা Pride East Entertainment ৰ! মন্ত্ৰী পিযুষ হাজৰিকা নেতৃত্বাধীন জনসংযোগ বিভাগৰ পৰা তিনিবছৰতে লাভ কৰিলে ২০ কোটিৰো অধিক টকাৰ চৰকাৰী বিজ্ঞাপনৰ নামত ধন!
যি বিজ্ঞাপনৰ ধন ২০১০ চনৰ পৰা ২০২১ চনলৈকে লাভ কৰিবলৈ সক্ষম হোৱা নাছিল শৰ্মা পত্নী পৰিচালন সঞ্চালক হৈ থকা Pride East Entertainment এ! জানিলে আচৰিত হ’ব বা চকু কপালত উঠিব যে মুঠ ১১ বছৰতহে Pride East Entertainment এ লাভ কৰিছিল ১০,৪০,৪৯,৯৯৪ টকাৰ বিজ্ঞাপন!
এয়া আছিল ২০১০-২১ চনৰ সময়ৰ কথা! অৰ্থাৎ প্ৰয়াত মুখ্যমন্ত্ৰী তৰুণ গগৈ আৰু প্ৰাক্তন মুখ্যমন্ত্ৰী সৰ্বানন্দ সোণোৱাল মুখ্যমন্ত্ৰী হৈ থকাৰ সময়ৰ কথা। কিন্তু ২০২১ চনৰ ১০ মে’ত ৰাজপাটত বহিল নিজকে দক্ষ আৰু প্ৰতাপী দেখুওৱা হিমন্ত বিশ্ব শৰ্মা। তাৰ পাছতে ভাগ্য উদয় হ’ল Pride East Entertainment ৰ। যেন লাভ কৰিলে আলাউদ্দিনৰ সেই বিশেষ চাকিগছি। জনসংযোগৰ পৰা ১০ বছৰে লাভ কৰা চৰকাৰী বিজ্ঞাপনৰ ধনৰ দুগুণ ধন লাভ কৰিলে মাত্ৰ ৩ বছৰতে!
সেইমতে, ২০২১০-২১ চনলৈকে লাভ কৰা ১০,৪০,৪৯,৯৯৪ টকাৰ বিপৰীতে ২০২১-২৪ চনৰ ভিতৰত অৰ্থাৎ ৩ বছৰত Pride East এ লাভ কৰিলে ২০,১১২০৮৫০ টকা!
ইয়াৰে ২০২১-২২ বৰ্ষত চৰকাৰী বিজ্ঞাপনৰ নামত লাভ কৰিলে ৫,৫২,৪১,৯২৯ টকা! ২০২২-২৩ বৰ্ষত বিজ্ঞাপনৰ নামত লাভ কৰিলে ৩,৭৪,৯০,৯৩৭ টকা! শুনি আচৰিত হ’লেও এয়াই সত্য যে ২০২৩-২৪ বৰ্ষতে Pride East Entertainmentএ লাভ কৰিলে ১০,০৪,৯৮,৩২৩ টকা!
বিধানসভাত লাহৰীঘাট সমষ্টিৰ বিধায়ক আচিফ মহম্মদ নাজাৰে কৰা এক প্ৰশ্নৰ উত্তৰত মন্ত্ৰী পিযুষ হাজৰিকাই তথ্য আৰু জনসংযোগ বিভাগে প্ৰদান কৰা তথ্যৰ পাছতেই পোহৰলৈ আহিল এই কথা। প্ৰশ্ন হৈছে, হিমন্ত বিশ্ব শৰ্মা মুখ্যমন্ত্ৰী হোৱাৰ সুবাদতে প্ৰাইড ইষ্ট এন্টাৰটেইনমেন্টে চৰকাৰী বিজ্ঞাপন প্ৰচাৰৰ বাবদ লাভ কৰিলে নেকি ১১ বছৰৰ তুলনাত তিনি বছৰতে দুগুণ ধনৰাশি। অভাৱনীয় হাৰত তিনিটা বছৰত চৰকাৰী বিজ্ঞাপনৰ প্ৰচাৰৰ নামত বৃদ্ধি পোৱা এই ধনৰাশিৰ প্ৰসংগই কি সূচাইছে সেই প্ৰশ্নৰ উত্তৰ ৰাইজে সহজেই বুজি পাব।
