দিখৌপৰীয়া মহিলা সমাজৰ উদ্যোগত আজি অনুষ্ঠিত হল বাৰেৰহণীয়া সাংস্কৃতিক অনুষ্ঠান আৰু এক প্ৰীতি ভোজৰ।
বৃহত্তৰ কোঁৱৰপুৰ অঞ্চলৰ আঠচল্লিশ খন গাঁৱৰ মহিলাসকল একত্ৰিত হৈ আয়োজন কৰে এই অভিনৱ অনুষ্ঠানটিৰ।
প্ৰতিবছৰে অঞ্চলটোত জাতি বৰ্ণ ধৰ্ম ভাষা নিৰ্বিশেষে আয়োজন কৰি আহিছে প্ৰীতিৰ অনুষ্ঠান। এই অনুষ্ঠানৰ জড়িয়তে শান্তি সম্প্ৰীতি আৰু ভাতৃত্ববোধৰ নিদৰ্শন দাঙি ধৰাৰ চেষ্টা চলাই আহিছে দিখৌপৰীয়া মহিলা সমাজে।
সামাজিক মাধ্যম হোৱাটচ এপ গ্ৰুপৰ জড়িয়তে যোগাযোগ ৰাখি আঠচল্লিছখন গাঁৱৰ মহিলা লগহৈ অনুষ্ঠিত কৰি আহিছে এই অনুষ্ঠানটো।
অনুষ্ঠানত মহিলাসকলৰ দ্বাৰা প্ৰদৰ্শন কৰা হয় বিভিন্ন জাতি জনগোষ্ঠীয় সাংস্কৃতিক অনুষ্ঠান।
গায়ন বায়েনে আৰম্ভ হোৱা অনুষ্ঠানত দশাৱতাৰ নৃত্য, কৃষ্ণ নৃত্য, বিয়া নাম, দিহা নাম, মিচিং জনগোষ্ঠীয় নৃত্য, জুমুৰ, নেপালী নৃত্য, বড়ো নৃত্য, বিহু নৃত্য, জিকিৰ আৰু জাৰীকে ধৰি বিভিন্ন সাংস্কৃতিক অনুষ্ঠান পৰিৱেশনেৰে দিনটোৰ শেষত একেলগে এসাঁজ গ্ৰহণ কৰে মহিলাসকলে।
অনুষ্ঠানত অসম আৰক্ষীৰ সঞ্চালক প্ৰধান ভাস্কৰজ্যোতি মহন্তৰ মাতৃ ড০ নিৰুপমা মহন্তই অংশগ্ৰহণ কৰাৰ লগতে সাংস্কৃতিক অনুষ্ঠানত অংশগ্ৰহণ কৰে।
