অসমৰ স্বাস্থ্য মন্ত্ৰী হিমন্ত বিশ্ব শৰ্মাই দিল্লীৰ নিজামুদ্দিনৰ জামাতৰ পৰা আহি অসমত লুকাই থকাসকললৈ সোমবাৰে শেষ সুযোগ আগবঢ়াইছে।
তেওঁ কয় যে আজিৰ পিছত ধৰা পৰা বা ওলাই অহা জামাতিসকলৰ বিৰুদ্ধে ৰাজ্য চৰকাৰে গোচৰ ৰুজু কৰিব।
“আজিৰ পাছত যিসকলে ধৰা দিব বা ওলাই আহিব সেইসকলৰ বিৰুদ্ধেও গোচৰ ৰুজু হ’ব যে বাৰেপতি অনুৰোধ জনোৱাৰ পাছতো তেওঁলোক কিয় ওলাই অহা নাছিল?” মন্ত্ৰী শৰ্মাই কয়।
অসমৰ ২৬ গৰাকী ক’ভিড-১৯ আক্ৰান্তৰ ২৫ গৰাকীৰেই নিজামুদ্দিনৰ ঘটনাৰ সৈতে সম্পৰ্ক থকাৰ পিছতো তালৈ যোৱা একাংশ লোকে এতিয়াও স্বাস্থ্য বিভাগৰ কাষ চপা নাই।
সোমবাৰে এক সংবাদমেলত মন্ত্ৰীজনে কয় যে দুৰ্যোগ ব্যৱস্থাপনা আইনৰ অধীনত লুকাই থকা জামাতিসকলৰ বিৰুদ্ধে চৰকাৰে ব্যৱস্থা ল’ব।
নিজামুদ্দিন মাৰ্কাজলৈ যোৱা জামাতিৰ তালিকা অসম চৰকাৰৰ হাতত থকা বুলিও মন্ত্ৰী শৰ্মাই প্ৰকাশ কৰে।
তেওঁ লগতে কয় যে ভাৰত চৰকাৰে ৰাজ্য চৰকাৰক এতিয়ালৈকে জামাতিৰ ৪ খন তালিকা যোগান ধৰিছে।
তেওঁ কয় যে ৰাজ্য চৰকাৰৰ মতে অসমৰ পৰা নিজামুদ্দিনৰ জামাতলৈ যোৱা লোকৰ সংখ্যা ৮৩১ গৰাকী হ’ব লাগে।
তেওঁ লগতে জনাই যে নিজামুদ্দিনৰ পৰা অহা লোকৰ ৬১৭টা নমুনা সংগ্ৰহৰ কথা আছিল আৰু বৰ্তমানলৈকে ৪৯১টা নমুনা সংগ্ৰহ কৰা হৈছে।
১২৮টা নমুনা সংগ্ৰহ কৰিবলৈ বাকী আছে বুলি মন্ত্ৰীগৰাকীয়ে জনায়।
নিজামুদ্দিনৰ জামাতৰ পিছতে দেশজুৰি ক’ভিড-১৯ত আক্ৰান্ত লোকৰ সংখ্যা হঠাতে বৃদ্ধি পায়।
স্বাস্থ্য মন্ত্ৰ্যালয়ৰ তথ্য মতে নিজামুদ্দিনৰ সমাৱেশে দেশৰ ১৭খন ৰাজ্য আৰু কেন্দ্ৰীয় শাসিত অঞ্চলত প্ৰভাৱ পেলাইছে।
