আজিৰে পৰা অসম প্ৰদেশ কংগ্ৰেছ কমিটিয়ে ‘কংগ্ৰেছৰ ৫ গেৰাণ্টি’ যাত্ৰা আৰম্ভ কৰিব।
প্ৰদেশ কংগ্ৰেছে আৰম্ভ কৰা বাছ যাত্ৰাৰ পিছত এয়া হ’ব দলটোৰ দ্বিতীয় বৃহৎ নিৰ্বাচনী প্ৰচাৰ কাৰ্যসূচী ।
‘কংগ্ৰেছৰ ৫ গেৰাণ্টি’ যাত্ৰা সন্ধৰ্ভত কংগ্ৰেছে এনেদৰে প্ৰকাশ কৰিছে—অসম বচাওঁ আহক বাছ যাত্ৰাৰ অভাৱনীয় সফলতাৰ পাছত, দলে ইতিমধ্যে আহৰণ কৰিবলৈ সক্ষম হোৱা গতি, অটুট ৰখা হ’ব ‘কংগ্ৰেছৰ ৫ গেৰাণ্টি’ যাত্ৰা। যি যাত্ৰাই ভোটগ্ৰহণৰ প্ৰথম পৰ্যায়ৰ পৰা আৰম্ভ কৰি তৃতীয় পৰ্যায়লৈকে এই কালচোৱাৰ ভিতৰত, অসমৰ ৩৩ খন জিলাৰ আটাইবোৰেই সামৰি ল’ব। কংগ্ৰেছ দলৰ জ্যেষ্ঠ নেতাসকলে এই যাত্ৰাৰ গুৰি ধৰিব আৰু এই যাত্ৰাৰ সময়ছোৱাত ৰাজ্যখনৰ আটাইবোৰ বিধানসভা সমষ্টিত আয়োজন কৰা অভিনৱ অনুষ্ঠানেৰে এই নেতাসকলে তৃণমূল পৰ্যায়ৰ লগত অহৰ্নিশে মত বিনিময় কৰি থাকিব।
নিখিল ভাৰত কংগ্ৰেছ কমিটীৰ সাধাৰণ সম্পাদক জিতেন্দ্ৰ সিঙে ১১ মাৰ্চত দুপৰীয়া ১২ বজাত ৩৭ নম্বৰ ৰাষ্ট্ৰীয় ঘাইপথত আৰু জাগীৰোড চহৰৰ সমীপত পশ্চিম নগাঁৱৰপৰা ‘কংগ্ৰেছৰ ৫ গেৰাণ্টি’ যাত্ৰাৰ পতাকা জোকাৰি শুভাৰম্ভণি কৰিব ।
এই অুষ্ঠানত উপস্থিত থাকিব লোকসভাৰ সাংসদ তথা কংগ্ৰেছ নিৰ্বাচনী প্ৰচাৰ অভিযান কমিটীৰ মুৰব্বী প্ৰদ্যুৎ বৰদলৈ।
আনহাতে সাংসদ তথা কংগ্ৰেছ নিৰ্বাচনী ইস্তাহাৰ কমিটীৰ অধ্যক্ষ গৌৰৱ গগৈয়ে দিনৰ ২ বাজি ১৫ মিনিটত যাত্ৰা আৰম্ভ কৰিব শোণিতপুৰ জিলাৰ তেজপুৰত থকা হালেশ্বৰ মন্দিৰৰ পৰা ।
