ৰাহুল গান্ধীৰ সাংসদ পদ বাতিলৰ ঘটনাই দেশৰ ৰাজনৈতিক উত্তাপ বৃদ্ধি কৰিছে। ২০২৪ ৰ লোকসভা নিৰ্বাচনৰ আগতে ৰাহুল গান্ধীক চুৰাটৰ এখন আদালতে ২০১৯ চনৰ মানহানিৰ গোচৰত দোষী সাব্যস্ত কৰিছে। সেই ক্ষেত্ৰত ৰাহুলক দুবছৰৰ কাৰাদণ্ড দিয়া হৈছিল। তাৰপিছতে ৰাহুল গান্ধীৰ সাংসদ পদ বাতিল কৰা হয়।
লোকসভা সচিবালয়ৰ দ্বাৰা জাৰী কৰা এক জাননীত এইটো কোৱা হৈছে। ইফালে, ৰাহুল গান্ধীয়ে সাংসদ পদ হেৰুৱাৰ পিছতে ইউপিএ অধ্যক্ষ ছোনিয়া গান্ধীকে ধৰি কেইবাজনো কংগ্ৰেছ নেতাই ৰণনীতি নিৰ্ধাৰণ কৰিবলৈ বহিছে।
ছোনিয়া গান্ধীৰ উপৰিও প্ৰাক্তন কেন্দ্ৰীয় মন্ত্ৰী পি চিদাম্বৰম আৰু জয়ৰাম ৰমেশো বৈঠকত উপস্থিত আছে। উপস্থিত আছে কংগ্ৰেছ সভাপতি মল্লিকাৰ্জুন খাৰ্গেও। লগতে উপস্থিত আছে প্ৰিয়ংকা গান্ধী ভদ্ৰা, কে চি বেণুগোপাল, ৰাজীৱ শুক্লা আৰু তাৰিক আনোৱাৰ, জ্যেষ্ঠ নেতা আনন্দ শৰ্মা, অম্বিকা চোনি, মুকুল ৱাছনিক, চলমান খুৰ্ছিদ আৰু পৱন কুমাৰ বনচাল।
লোকসভা সচিবালয়ৰ দ্বাৰা জাৰি কৰা এক জাননীত কোৱা হৈছে যে ৰাহুল গান্ধীৰ সাংসদ পদ খাৰিজ কৰা হৈছে। সাংবিধানিক আইন অনুসৰি, এজন নিৰ্বাচিত ৰাজহুৱা প্ৰতিনিধিয়ে দোষী সাব্যস্ত হ’লে আৰু দুবছৰ বা অধিক সময়ৰ বাবে দণ্ডিত হ’লে তেওঁৰ সংসদীয় পদ হেৰুৱাব পাৰে।
সেই নিয়ম অনুসৰি, ৰাহুলৰ ক্ষেত্ৰত ব্যৱস্থা লোৱা হয়। ২০১৯ চনৰ এটা গোচৰত, চুৰাটৰ এখন আদালতে ৰাহুল গান্ধীক ‘মোডী’ পদবীৰ সন্দৰ্ভত কৰা মন্তব্যৰ বাবে দুবছৰৰ কাৰাদণ্ড প্ৰদান কৰিছিল। ৰাহুলক গোচৰটোত এমাহৰ বাবে জামিন দিয়া হৈছে।
ৰাহুল গান্ধীয়ে কয়, “মই দেশৰ কণ্ঠস্বৰৰ বাবে যুঁজি আছো। আৰু মই ইয়াৰ বাবে যিকোনো মূল্য পৰিশোধ কৰিবলৈ সাজু।‘’
ইপিনে, গুজৰাটৰ চুৰাটৰ জিলা আদালতৰ ৰায়ৰ পৰিপ্ৰেক্ষিতত ৰাহুল গান্ধীক সাংসদ হিচাপে বৰ্খাস্ত কৰাটোৱে ৰাষ্ট্ৰীয় ৰাজনীতিত এক বৃহৎ প্ৰতিক্ৰিয়াৰ সৃষ্টি কৰিছে। মমতা বেনাৰ্জীৰ পৰা অৰবিন্দ কেজৰিৱাললৈকে কেইবাজনো বিৰোধী নেতাই এই বিষয়টোত সৰৱ হৈ পৰিছে।
