সংগীত শিল্পী মানস ৰবীনে ক’ৰ’না ভাইৰাছৰ বিৰুদ্ধে যুঁজাৰ বাবে অসমৰ মুখ্য মন্ত্ৰীৰ সাহায্য পুঁজিলৈ এক লাখ টকাৰ বৰঙনি আগবঢ়োৱাৰ কথা ঘোষণা কৰিছে।
চৰকাৰী নীতি-নিৰ্দেশনা মানি লকডাইনত ঘৰতে আৱদ্ধ হৈ থকা শিল্পীজনে আজি এক ভিডিঅ’ বাৰ্তাৰ জৰিয়তে মুখ্য মন্ত্ৰীৰ সাহায্য পুঁজিলৈ এই ধনখিনি আগবঢ়োৱাৰ কথা ৰাজহুৱা কৰে।
ভিডিঅ’ বাৰ্তাটোত শিল্পীজনে এই কঠিন সময়চোৱাত নিজৰ মৃত্যুলৈ ভয় নকৰি দায়িত্ব পালন কৰি থকা চিকিৎসাকৰ্মী সকলৰ লগতে আৰক্ষী, সংবাদকৰ্মী আৰু অন্যান্য জৰুৰী সেৱাৰ লগত জৰিত লোকসকলক ধন্যবাদ জনায়।
তেওঁ লগতে শ্বুটিং তথা বিভিন্ন সাংস্কৃতিক অনুষ্ঠান বাতিল হোৱাৰ ফলত শিল্পীসকল আৰ্থিকভাৱে বিভিন্ন সমস্যাৰ সন্মুখীন হৈছে যদিও ৰাজ্য চৰকাৰক প্ৰয়োজনৰ সময়ত এই সামান্য পৰিমাণৰ বৰঙনি আগবঢ়াব পাই সুখী বুলি মন্তব্য কৰে।
ইয়াৰ উপৰি ৰাজ্য চৰকাৰৰ আৰোগ্য নিধিলৈ সহায় আগবঢ়োৱা প্ৰত্যেকগৰাকী লোককে ধন্যবাদ জ্ঞাপন কৰে।
উল্লেখ্য যে মানস ৰবীনৰ পূৰ্বে অসমৰ জনপ্ৰিয় কণ্ঠশিল্পী জুবিন গাৰ্গ, অভিনেতা যতীন বৰা, আইমী বৰুৱাৰ আন বহু লোকে মুখ্য মন্ত্ৰীৰ সাহায্য পুঁজিলৈ সহায় আগবঢ়াইছে।
