কলিয়াবৰৰ সোনাজুৰি বজাৰৰ পৰা লাংখাং সংযোগী ২.৫৩৮ কিলোমিটাৰ দৈৰ্ঘ্যৰ পকীপথটো নিৰ্মাণৰ ক্ষেত্ৰত ব্যাপক দুৰ্নীতি সংঘটিত হোৱাৰ অভিযোগ উত্থাপন হৈছে। ‘কলিয়াবৰ গ্ৰাম্য পথ সংমণ্ডলৰ’ বিষয়া-অভিযন্তা আৰু ঠিকাদাৰৰ বিৰুদ্ধে উঠিছে এই অভিযোগ।
প্ৰধান মন্ত্ৰী গ্ৰাম চড়ক যোজনা (পি এম জি এছ ৱাই) আঁচনিৰ অধীনত গ্ৰাম্য পথটো নিৰ্মাণৰ বাবে ১৬৮ লাখ ২৮ হাজাৰ টকা আবন্টন কৰা হৈছিল। কিন্তু অত্যাধিক মুনাফা লুটাৰ উদ্দেশ্যে আঢ়ৈ কিলোমিটাৰ দৈঘ্যৰ পথটোৰ নিৰ্মাণত একেবাৰে নিম্নমানৰ সামগ্ৰী ব্যৱহাৰ কৰা অভিযোগ তুলিছে স্থানীয় একাংশ সচেতন লোকে।
গ্ৰাম্য পথটো নিৰ্মাণৰ ঠিকা লাভ কৰা মেচাৰ্চ আৰ কে কনষ্ট্ৰাকচনে পথটোৰ নিৰ্মাণত পাহাৰৰ পৰা নিম্নমানৰ শিলৰ লগতে বালি ব্যৱহাৰ কৰিছে যাৰ ফলত নিৰ্মীয়মান পথটোৰ ওপৰেদি ৰ’লাৰ চলালেই গুৰি হৈ পৰে পথটোৰ নিৰ্মাণত ব্যৱহাৰ কৰা অধিকাংশ শিল। তদুপৰি পথটোৰ নিৰ্মাণত ব্যৱহাৰ হোৱা শিলসমূহত মাটিৰ পৰিমাণেই অধিক। যাৰ বাবে পথটোৰ নিৰ্মাণক লৈ তীব্ৰ অসন্তুষ্টি প্ৰকাশ কৰিছে স্থানীয় ৰাইজে।
অঞ্চলটোৰ লোকসকলে বিসংগতিপুৰ্ণ এই পথ নিৰ্মাণ সন্দৰ্ভত বাৰম্বাৰ বিভাগীয় কৰ্তৃপক্ষক অৱগত কৰিছে যদিও কলিয়াবৰ গ্ৰাম পথ সংমণ্ডলৰ বিষয়া-অভিযন্তাই এই ক্ষেত্ৰত কাণষাৰ দিয়া নায়।
