৯ বছৰৰ মূৰত অনুষ্ঠিত হোৱা গুৱাহাটী পৌৰ নিগমৰ ৬০ খন আসনৰেই ভোট গণনা সম্পূৰ্ণ হৈছে।
প্ৰত্যাশিত ভাবেই শাসকীয় বিজেপি মিত্ৰজোঁটৰ প্ৰাৰ্থীয়ে গুৱাহাটী পৌৰ নিগমৰ গৰিষ্ঠসংখ্যক আসন লাভ কৰিবলৈ সক্ষম হৈছে।
ব্যতিক্ৰম হিচাবে অৰবিন্দ কেজৰিৱাল নেতৃত্বাধীন আম আদমী পাৰ্টী অসম জাতীয় পৰিষদে দুটা ৱাৰ্ডত বিজয় সাৱস্ত্য কৰিছে।
ভোট গণনাৰ ফলাফল অনুসৰি ৬০ খন আসনৰ ভিতৰৰে ৫২ খনতে বিজেপিৰ প্ৰাৰ্থী জয়ী হৈছে। দলটোৰ তিনিগৰাকী প্ৰাৰ্থীয়ে বিনা প্ৰতিদ্বন্দ্বিতাৰে বিজয়ী হৈছে।
সেয়ে ৫৭ টা সমষ্টিতহে ভোটগ্ৰহণ অনুষ্ঠিত হৈছিল। আনহাতে বিজেপি মিত্ৰজোঁটৰ আন এটা অন্যতম সহযোগী দল অসম গণ পৰিষদে গুৱাহাটী পৌৰ নিগমৰ নিৰ্বাচনত ৭ খন আসনত প্ৰাৰ্থী দিছিল।
৭ খন আসনৰ ভিতৰৰে ৬ খনতে অগপৰ প্ৰাৰ্থী বিজয়ী হৈছে। অসম জাতীয় পৰিষদৰ এগৰাকী আৰু আম আদমী পাৰ্টীৰ এগৰাকীকৈ প্ৰাৰ্থী বিজয়ী হৈছে।
১ নং ৱাৰ্ডৰ অসম জাতীয় পৰিষদৰ প্ৰাৰ্থী হুকুম চান্দ বক্সী আৰু ৪২ নং ৱাৰ্ডৰ আপৰ প্ৰাৰ্থী মাছুমা বেগমে বিজেপি মিত্ৰজোঁটৰ বিশাল প্ৰচাৰ অভিযানৰ পিছতো বিজয় সাৱস্ত্য কৰিবলৈ সক্ষম হৈছে।
৭ খন আসনৰ ভিতৰৰে ৬ খনতে জয়ী হোৱা অগপই গুৱাহাটী পৌৰ নিগমৰ উপ-মেয়ৰৰ পদটো দাবী কৰিব পাৰে বুলি বিভিন্ন মহলত চৰ্চা হৈছে।
সাংবাদিকৰ প্ৰশ্নৰ উত্তৰত অগপৰ নেতা ৰমেন্দ্ৰ নাৰায়ণ কলিতায়ো তেনে ইংগিতেই দিছে। তাৎপৰ্যপূৰ্ণ কথাটো হ’ল ৯ বছৰ আগতে গুৱাহাটী পৌৰ নিগমৰ নিৰ্বাচনত দপদপাই থকা কংগ্ৰেছ এইবাৰ সম্পূৰ্ণৰূপে ধূলিস্যাৎ হৈ পৰিল।
সৰ্বভাৰতীয় দলটোৱে গুৱাহাটী পৌৰ নিগমৰ নিৰ্বাচনত এখনো আসন লাভ কৰিবলৈ সক্ষম নহ’ল।
৬০ খন আসনৰ ভিতৰৰে ৫৪ খনতে প্ৰাৰ্থী দিয়াৰ পিছতো দলটোৱে এখনো আসন দখল কৰিবলৈ সক্ষম নোহোৱা কথাই কংগ্ৰেছৰ প্ৰতি যে গুৱাহাটীবাসীৰ মোহভংগ ঘটিছে তাকেই প্ৰমাণ কৰিলে বুলি বহুতে মন্তব্য কৰিছে।
