নাগৰিকত্ব সংশোধনী বিধেয়ক-২০১৬ গৃহীত কৰাৰ দাবীৰে অহা ১৭ নৱেম্বৰত গুৱাহাটীত ২৬ টা বাঙালী সংগঠনে আয়োজন কৰা বিশাল সমাৱেশৰ সৰ্বত্ৰে বিৰোধিতা হৈ থকাৰ সময়তে এইবাৰ ভাৰতৰ কমিউনিষ্ট পাৰ্টীৰ অসম ৰাজ্য পৰিষদ চমুকৈ চি পি আইয়েও ঘোৰ বিৰোধিতা কৰিছে।
চি পি আই দলৰ ফালৰ পৰা কোৱা হৈছে যে যদিহে ১৭ নবেম্বৰত এই সমাৱেশ অনুষ্ঠিত হয় তেন্তে অসমত ভয়ংকৰ সংঘৰ্ষ হোৱাৰ সম্ভাৱনা আছে। সেয়ে শান্তি-সম্প্ৰীতি অটুত ৰখাৰ স্বাৰ্থত এই সমাৱেশ অনুষ্ঠিত কৰিবলৈ অনুমতি দিয়াৰ বিপৰীতে বন্ধ কৰাৰ বাবেহে ব্যৱস্থা ল’বলৈ ৰাজ্য চৰকাৰৰ ওচৰত দাবী উত্থাপন কৰে।
দলটোৰ নেতা-কৰ্মীসকলে কয় যে প্ৰকৃততে অসমত বসবাস কৰি থকা অবৈধ হিন্দু বাংলাদেশী নাগৰিকসকলেহে এই বিধেয়কখনৰ সমৰ্থনত আন্দোলন তীব্ৰতৰ কৰি তোলা পৰলিক্ষিত হৈছে। তদুপৰি ভাৰতীয় হিন্দু বাঙালীয়েও বিজেপি আৰু আৰ এছ এছৰ উচটনিত বিধেয়কৰ সমৰ্থনত এনেধৰণৰ হুংকাৰ প্ৰদান কৰিছে।
মন কৰিবলগীয়া যে বিজেপিৰ ৰাষ্ট্ৰীয় আৰু ৰাজ্যিক কমিটিয়ে বিধেয়কখনৰ সমৰ্থনত প্ৰস্তাৱ গ্ৰহণ কৰাৰ পিছৰে পৰা উক্ত লোক তথা সংগঠনসমূহ উৎসাহিত হৈ পৰিছে।
আনহাতে বিজেপি বিধায়ক শিলাদিত্য দেবে বিভিন্ন সময়ত কৰি অহা সাম্প্ৰদায়িক মন্তব্য সন্দৰ্ভতো কমিউনিষ্ট দলটোৱে মন্তব্য কৰা দেখা যায়। আৰ এছ এছ-বিজেপি অসমীয়া জাতি তথা অসমৰ বাবে শত্ৰু। সেয়ে শিলাদিত্যৰ দৰে নেতাই বাৰে বাৰে অসমীয়া জাতি তথা অসমীয়া লোকক এইদৰে অপমান কৰি আহিছে।
