২০১৬ৰ ৰঞ্জি আৰু ইৰাণী ট্ৰফীত ৫৩ টাকৈ উইকেট দখল কৰি দেশৰ ভিতৰতে সৰ্বাধিক উইকেট দখলকাৰী হিচাপে পৰিগণিত হোৱা তথা ‘ইণ্ডিয়া এ’ দলৰ হৈ খেলা অসমৰ পেচ বলাৰ কৃষ্ণ দাসে অসমৰ পৰিৱৰ্তে চলিত ছিজনত গোৱাৰ হৈ খেলাৰ সিদ্ধান্ত লৈছে।
জানিব পৰা মতে আজি কৃষ্ণই বিজয় হাজাৰে এদিনীয়া ক্ৰিকেটত গোৱাৰ হৈ অভিযান আৰম্ভ কৰিব। ভাৰতীয় ঘৰুৱা ক্ৰিকেটৰ তিনিওটা ফৰ্মেট ক্ৰমে ৰঞ্জি ট্ৰফী, এদিনীয়া আৰু টি ২০ৰ বাবে ‘প্ৰভিজনেল’ খেলুৱৈ হিচাপে গোৱাত চুক্তিবদ্ধ হৈছে কৃষ্ণ।
উল্লেখ্য যে ৰে’লৱেৰ চাকৰিয়াল কৃষ্ণই ৰে’লৱেৰ পৰা আপত্তিহীম প্ৰমাণ-পত্ৰ লৈ যোৱা ৩০ আগষ্টতে গোৱা দলচ খেলাটো নিশিচিত কৰিছিল। মন কৰিবলগীয়া যে অসমৰ হৈ খেলিবলৈ ৰে’লৱেই আপত্তিহীন প্ৰমাণ-পত্ৰ নিদিয়াৰ বাবেই যোৱাটো ছিজনত কৃষ্ণই অসমৰ হৈ মাত্ৰ এখন মেচ খেলিছিল।
পেচ বলাৰ গৰাকীয়ে অসমৰ পৰিৱৰ্তে গোৱাৰ হৈ খেলিবলৈ লোৱা সিদ্ধান্ত সম্পৰ্কত কয়- ‘অসমৰ হৈ খেলিবলৈ মই সদায় সাজু থাকো। আশা কৰো গোৱাৰ হৈ সুন্দৰ প্ৰদৰ্শন কৰিব পাৰিম আৰু অহা বছৰ আকৌ অসম দলত স্থান ল’ব বিছাৰো’।
উল্লেখ্য যে, ৪০ খন ৰঞ্জী ট্ৰফীত ১৪০ টা উইকেট লাভ কৰা কৃষ্ণ দাসৰ শ্ৰেষ্ঠ প্ৰদৰ্শন উৰিষ্যাৰ বিৰুদ্ধ ২১ ৰাণত ৭ টা উইকেট লাভ ৷ ১৯ বছৰ অনুৰ্ধ্বৰ ভাৰতীয় দল, ভাৰতীয় ব্লু দল, ভাৰতীয় “এ” দল, অৱশিষ্ট ভাৰতীয় দলৰ লগতে ইৰাণী ট্ৰফীত অংশগ্ৰহণ কৰি নিজৰ শ্ৰেষ্ঠত্ব প্ৰদৰ্শন কৰিবলৈ সক্ষম হৈছে কৃষ্ণ দাসে।
আনহাতে অসমৰ একাংশ প্ৰাক্তন ক্ৰিকেটাৰে কৃষ্ণৰ এই সিদ্ধান্তক সহজভাৱে মানি ল’ব পৰা নাই। তেওঁলোকে অসম ক্ৰিকেট সন্থাৰ অমনযোগিতাৰ বাবে এনেধৰণৰ ঘটনা সংঘটিত হোৱা বুলি মত প্ৰকাশ কৰে।
